Memleket basshysy Qasym-Jomart Toqaev Qazaqstan halqy Assambleıasynyń (QHA) HHHİV sesıasynda sóılegen sózinde uıymnyń el ishindegi turaqtylyq pen kelisimdi nyǵaıtýdaǵy tarıhı rólin erekshe atap ótti. Bul týraly Aqshamnews.kz saıty habarlaıdy.
Prezıdent óz sózin Qazaqstan halqy Assambleıasynyń 30 jyldyǵymen quttyqtaýdan bastady. "Búgingi basqosýdyń tarıhı mán-mańyzy aıryqsha. Bıyl Qazaqstan halqy Assambleıasynyń qurylǵanyna 30 jyl tolyp otyr. Barshańyzǵa qutty bolsyn!" – dedi Memleket basshysy.
Toqaev Assambleıanyń úsh onjyldyqtaǵy eńbegi eldegi beıbitshilik pen qoǵamdyq kelisimniń irgetasyn qalap, turaqty damý jolynda mańyzdy ról atqarǵanyn aıtty. Onyń pikirinshe, QHA – etnosaralyq kelisimniń biregeı úlgisi retinde álemde teńdesi joq qurylym.
Prezıdent Assambleıanyń elimizdegi túrli etnostar arasyndaǵy ózara qurmet pen túsinistikti nyǵaıtýǵa qosqan úlesine joǵary baǵa berdi.
"Assambleıa qoǵamdaǵy turaqtylyq pen kelisimdi nyǵaıtýǵa ólsheýsiz úles qosty. Elimizdegi birlik pen teńdiktiń, turaqtylyq pen tynyshtyqtyń sımvolyna aınaldy", – dedi Toqaev.
Sondaı-aq QHA-nyń etnosaralyq qatynastar salasynda qoǵamdyq ınstıtýt retinde mańyzy artqanyn, onyń arqasynda Qazaqstanda beıbit ómir súrýdiń úlgisi qalyptasqanyn atap ótti.
Memleket basshysy Assambleıanyń qoǵamdyq uıymdarmen jáne memlekettik ınstıtýttarmen tyǵyz baılanysta jumys isteıtinin, sondaı-aq ishki saıasattyń júzege asýyna belsendi túrde atsalysyp jatqanyn aıtty.
"Assambleıa memleket pen qoǵam arasynda syndarly ári jemisti dıalog ornatýǵa yqpal etýde", – dep naqtylady ol. QHA-nyń 12 múshesi qazirgi ýaqytta Ulttyq quryltaı quramynda eńbek etip, eldik mańyzy bar bastamalarǵa atsalysyp jatqanyn da atap ótti.