Maýsym aıynda Almatynyń «Ójet» shaǵyn aýdanyndaǵy toǵan aýmaǵyn kórkeıtý jobasy aıaqtalady
Alataý aýdanynyń turǵyndarymen kezdesý barysynda Almaty ákimi Erbolat Dosaev aýdannyń qoǵamdyq keńistikterin damytý jáne kórkeıtý jumystary týraly aıtty.
2024 jyly aýdanda úsh joba júzege asyrylyp, aýdan kórkeıe tústi. Sonyń biri – Qarasý shaǵyn aýdanynda 10,7 gektar aýmaqta skver men jaıaý júrginshiler aımaǵyn kóriktendirý. Bul jerde shaǵyn sáýlet pishinderi, kóshe jıhazdary men demalysqa arnalǵan besedkalar ornatylyp, jaryqtandyrý jańartylyp, jańa jasyl jelekter otyrǵyzyldy.
Sondaı-aq, Daraboz shaǵyn aýdanyndaǵy meshit mańynda 6,2 gektar aýmaqty qamtıtyn saıabaq salyndy jáne «Boraldaı» ózeniniń jaǵalaýyndaǵy 24 gektar jer kóriktendirildi.
Buǵan qosa, 2024 jyly 6 qoǵamdyq keńistikte aǵymdaǵy jóndeý jumystary júrgizilip, jalpy quny 2,6 mlrd teńgege avtosýarý júıeleri ornatyldy.
Kezdesý barysynda qala ákimi 2025 jylǵa arnalǵan josparyn da aıtty.
«2025 jyldyń maýsymynda «Ójet» shaǵyn aýdanyndaǵy 16 gektar aýmaqtaǵy toǵan mańyn kórkeıtý jobasyn aıaqtaýdy josparlap otyrmyz. Joba aıasynda jasyl jelekter otyrǵyzý, jaıaý júrginshiler aımaqtaryn jasaý, sport jáne balalar alańdaryn salý kózdelip otyr», – dedi Erbolat Dosaev.
Sonymen qatar, «Halyq qatysatyn búdjet» (HQB) baǵdarlamasy jalǵasyp keledi. 2024 jyly osy baǵdarlama aıasynda 45 joba júzege asyrylyp, onyń ishinde 24 qoǵamdyq keńistik pen 10 aýla kórkeıtildi.
«2025 jyly qala búdjetinen turǵyndar usynǵan 570-ten astam usynystyń ishinen tańdalǵan 50 jobany júzege asyrý úshin 2,5 mlrd teńge bólindi. Bıyl naýryz ben qyrkúıek aralyǵynda 31 qoǵamdyq keńistik, 16 aýla aýmaǵy kórkeıip, kóshe jaryǵyn jańartý boıynsha 3 joba júzege asyrylady», – dedi Almaty ákimi.
Aıta keteıik, Almatyda 2024 jyly HQB aıasynda 364 joba júzege asyryldy. 2019 jylmen salystyrǵanda 2024 jyly almatylyqtardan túsken ótinish sany 18 ese artqan. Baǵdarlamanyń tıimdiligi men turǵyndardyń belsendiligin eskere otyryp, Almaty ákimi Erbolat Dosaev 2024 jyly qarjylandyrýdy 18,8 mlrd teńgege deıin ulǵaıtty, bul 2023 jylmen salystyrǵanda 5,8 mlrd teńgege artyq.