Qazaqstan Prezıdenti Reseı Federasıasyna jumys saparynyń ekinshi kúni Qazan qalasynda boldy
Memleket basshysynyń Tatarstan Respýblıkasyna sapary «Qazan Kremli» memlekettik tarıhı-arhıtektýralyq jáne kórkem mýzeı-qoryǵyna barýdan bastaldy. Ondaǵy kórikti jerlerdi Qasym-Jomart Toqaevqa Tatarstan Prezıdenti Rýstam Mınnıhanov tanystyrdy, dep habarlaıdy Almaty-akshamy.kz Aqordaǵa silteme jasap.
Rýstam Mınnıhanov IýNESKO-nyń búkilálemdik muralarynyń tizimine engen osy biregeı tarıhı keshen týraly áńgimelep berdi. Qasym-Jomart Toqaev Qazan Kremli aýmaǵyndaǵy «Qul Sharıf» meshiti men Blagoveshenskıı soboryn aralap kórdi.
Meshitte Tatarstan Respýblıkasy musylmandary dinı basqarmasynyń tóraǵasy Kamıl Samıgýllın quran oqydy.
Blagoveshenskıı soborynda Qazaqstan Prezıdenti Qazan jáne Tatarstan mıtropolıti Kırılldi bıyl elordada ótetin Álemdik jáne dástúrli dinder kóshbasshylarynyń sezine qatysýǵa shaqyrdy.
«Qul Sharıf» meshiti Qazan handyǵynyń áıgili eskertkishi – XVI ǵasyrdyń ekinshi jartysyna deıin buzylmaı turǵan kóne soborly meshitti eske alý maqsatymen 2005 jyly Tatarstannyń Tuńǵysh Prezıdenti Mıntımer Shaımıevtiń Jarlyǵyna sáıkes salynǵan jáne onyń ataýy ımam Qul Sharıftiń qurmetine qoıylǵan.
Blagoveshenskıı soborynyń irgetasy 1552 jyly orys patshasy IV Ivan Groznyıdyń jarlyǵymen qalanǵan.
