Prezıdent qazaqstandyqtardyń Olımpıada oıyndary barysynda bizdiń sportshylarǵa kórsetetin kúshti qoldaýy olarǵa qosymsha rýh beretinine senim bildirdi.
Memleket basshysy HHHİİ jazǵy Olımpıada oıyndary qarsańynda Qazaqstannyń ulttyq qurama komandasynyń múshelerimen kezdesti, dep habarlaıdy Almaty-akshamy.kz Akorda.kz saıtyna silteme jasap.
Qazaqstan qurama komandasynyń negizgi bóligi kezdesýge Almaty oblysyndaǵy «Aqbulaq» olımpıadalyq ortalyǵynan telekópir arqyly qatysty. Onda sportshylar Tokıoǵa attanar aldyndaǵy sońǵy jattyǵý jıyndaryn ótkizip jatyr.
Prezıdent Olımpıadaǵa baratyn sportshylardyń aldynda sóılegen sózinde álemniń basty sport básekesinde el namysyn qorǵaý mártebeli mindet, úlken abyroı, zor jaýapkershilik ekenin aıtty.
Memleket basshysy Táýelsizdik jyldarynda Qazaqstannan Olımpıadanyń 16 jeńimpazy, 71 júldegeri shyqqanyn, júzden astam iri sport kesheni, onyń ishinde,16 halyqaralyq deńgeıdegi nysandar boı kótergenin atap ótti.
Qasym-Jomart Toqaev asa kúrdeli kezeńde Tokıoda jaǵylatyn Olımpıada alaýy búkil adamzat úshin jahandyq indetpen kúrestiń sımvoly bolatynyn aıtty. Prezıdent álemniń túgelge jýyq elinde uzaqqa sozylǵan lokdaýnnyń qalypty tynys-tirshilikke aýyr soqqy jasaǵanyna toqtaldy.
«Sizder halyqaralyq deńgeıdegi ózderińizdiń kóshbasshylyq oryndaryńyzdy nyǵaıtý úshin naǵyz chempıonǵa tán minez kórsetip, Olımpıada lısenzıasyn ıelendińizder. Osyndaı qıyn-qystaý jaǵdaıda sizder sporttyń ózin-ózi shekteıtin qatań rejımin saqtap, ózgelerge úlgi kórsettińizder», – dedi Qasym-Jomart Toqaev.
Prezıdent qazaqstandyqtardyń Olımpıada oıyndary barysynda bizdiń sportshylarǵa kórsetetin kúshti qoldaýy olarǵa qosymsha rýh beretinine senim bildirdi.
«Táýelsizdigimizdiń 30 jyldyǵynda Olımpıada tuǵyryna kóterilý - sizderdiń ǵana jetistikterińiz emes, búkil ultymyzdyń abyroıy. Olımpıada shyńy myńdaǵan jasty sportpen shuǵyldanýǵa, salaýatty ómir saltyn ustanýǵa jáne kózdegen maqsattaryna jetýge shabyttandyrady», – dedi Qasym-Jomart Toqaev.
Memleket basshysy óz sózinde buqaralyq jáne balalar men jasóspirimder sportyn damytýǵa basymdyq beriletinin atap ótti.
«Buqaralyq sportty damytý arqyly biz ultymyzdyń densaýlyǵyn jaqsartamyz jáne búkil elimiz maqtan tutatyn Olımpıada jeńimpazdarynyń – sport juldyzdarynyń jańa býynyn tárbıelep shyǵaramyz. Mundaı saıasat sport seksıalary men aýlalyq klýbtardyń damýyna tyń serpin beredi. Sondaı-aq balalar jattyqtyrýshylaryn yntalandyrýǵa yqpal etip, daryndy atletterdiń jańa shoǵyryn aıqyndaýǵa septigin tıgizedi», – dedi Prezıdent.
Qasym-Jomart Toqaev sportshylarymyzdyń Tokıoda rekordtyq nátıjeler kórsetetinine, elimizdiń álemdegi jetekshi sport derjavalarynyń arasyndaǵy bedelin nyǵaıtatynyna senim bildirdi. Prezıdenttiń aıtýynsha, atletterdiń árbir jeńisiniń artynda, kóbinese nazardan, kameralardan tys qalatyn, olardyń jattyqtyrýshylarynyń qajyrly eńbegi tur.
Rásim barysynda Qasym-Jomart Toqaev Qazaqstan Respýblıkasynyń Memlekettik Týyn alǵash ret eki birdeı tý ustaýshyǵa – jeńil atletıkadan Olımpıada chempıony Olga Rypakova men bokstan álem chempıonatynyń kúmis júldegeri Qamshybek Qońqabaevqa tabystady.
Olga Rypakova Memleket basshysyna jyly qabyldap, izgi tilek bildirgeni úshin ulttyq quramanyń atynan alǵys aıtty
«Sizdiń aq tilegińiz bizge erekshe kúsh-jiger beredi. Halqymyzdyń rıasyz mahabbatyn sezinemiz jáne ózimizge júktelgen jaýapkershilikti túsinemiz. Sondyqtan Otanymyzdyń abyroıyn arttyrý úshin bar kúshimizdi salyp, sheberligimizdi pash etemiz», – dedi Olga Rypakova.
Qamshybek Qońqabaev Prezıdentke otandastarymyzdyń senimin aqtaý úshin qurama komanda baryn salatynyn jetkizdi.
«Sizdiń qolyńyzdan elimizdiń Týyn alý – úlken abyroı, zor jaýapkershilik. Olımpıadaǵa qatysýshy sportshylar qasterli sanaıtyn osy Týdyń Tokıo tórinde jıi kóterilip, Ánuranymyzdyń shyrqalýy úshin barymyzdy salamyz», – dedi bokstan Qazaqstan qurama komandasynyń kapıtany.
