Memleket basshysy Mańǵystaý oblysyna jumys saparymen keldi, dep habarlaıdy Almaty-akshamy.kz Aqordanyń baspasóz qyzmetine silteme jasap.
Sapar barasynda Prezıdent Mańǵystaý oblysy jurtshylyǵymen kezdesti.
«Aqtaýǵa kelerdiń aldynda janashyr ári aqylshy aǵamyz bolǵan Ábish Kekilbaev oıyma oraldy. Ábekeń ekeýimiz biraz jyl qyzmettes bolyp, birge júrdik. Aǵa-ini retinde syılasyp, jaqyn aralastyq. Elimizdiń ótkeni, búgini jáne bolashaǵy týraly jıi áńgimelesetin edik. Ádebıet taqyrybynda pikir almastyq. Qazir «Ábish álemi» degen uǵym halqymyzdyń sanasyna ábden sińip ketti. Rasynda, biregeı tulǵa, asa kórnekti jazýshy, tarıhshy, fılosof Ábish Kekilbaevty biz jáne óskeleń urpaq árqashan jadymyzda saqtaýymyz kerek. Bul – bizdiń azamattyq, ulttyq boryshymyz. Abyz aǵamyz – barsha qazaqtyń maqtanyshy. Ábekeń týǵan ólkesi Mańǵystaýdy erekshe jaqsy kóretin. Qasıetti oryndary, qaıtalanbas tabıǵaty jáne keńpeıil halqy týraly sóılegende shabyttanyp ketetin. «Mańǵystaýdyń darıasy – halqynyń kókireginde» dep jıi aıtatyn. Osy óńirge kelgen saıyn sol sózderdiń aqıqat ekenine kózimiz jetetini anyq. Men 2019 jyly Ábish aǵanyń eskertkishiniń ashylýyna arnaıy keletinimdi aıtqan edim. Keıin sol ýádemdi oryndap, Aqtaýda qazaq halqynyń uly perzentine arnalǵan eskertkishtiń ashylý rásimine qatystym. Sol sebepti, ózderińizben kezdesýdi Ábish aǵa týraly estelikten bastap otyrmyn»,- dedi Prezıdent.