Qasym-Jomart Toqaev jańadan saılanǵan Túrikmenstan Prezıdenti Serdar Berdimuhamedovpen jáne Gýrbangýly Berdimuhamedovpen telefon arqyly sóılesti
Memleket basshysy Qasym-Jomart Toqaev Serdar Berdimuhamedovti Prezıdent saılaýyndaǵy jeńisimen quttyqtap, Túrikmenstannyń ıgiligi men órkendeýi jolyndaǵy onyń asa jaýapty memlekettik qyzmetine mol tabys tiledi, dep habarlaıdy Almaty-akshamy.kz Aqordanyń resmı saıtyna silteme jasap.
Taraptar eki el halyqtarynyń arasyndaǵy kóp ǵasyrlyq dostyqqa, tatý kórshilik pen ózara qoldaýǵa negizdelgen baılanystardy jalǵastyra otyryp, Qazaqstan men Túrikmenstannyń strategıalyq yntymaqtastyǵyn odan ári nyǵaıtýǵa múddeli ekenin rastady.
Qazaqstan Prezıdenti Túrikmenstan basshylyǵynyń qýatty ári órkendegen memleket qurý jónindegi strategıalyq baǵdarynyń sabaqtasa jalǵasatynyna senim bildirdi.
Qasym-Jomart Toqaev Serdar Berdimuhamedovti elimizge memlekettik saparmen kelýge shaqyrdy.
Áńgimelesý barysynda Memleket basshysy Qasym-Jomart Toqaev Gýrbangýly Berdimuhamedovti de saılaýdyń sátti ótýimen quttyqtap, daýys berýshilerdiń is-sharaǵa belsendi qatysqanyn aıtty.
Qasym-Jomart Toqaev Prezıdent Gýrbangýly Berdimuhamedovtiń baýyrlas eki el arasyndaǵy dostyqty, tatý kórshilikti jáne ózara tıimdi yntymaqtastyqty nyǵaıtýǵa qosqan jeke úlesin erekshe atap ótti.
Sondaı-aq Gýrbangýly Berdimuhamedovtiń saıası ári ómirlik mol tájirıbesi Túrikmenstanda jáne odan tys jerlerde keńinen suranysqa ıe bola beretinine senim bildirdi.