Qazaqstan kınoteatrlarynda Gollıvýd fılmderi kórsetilmeı qalýy múmkin.
Reseıge qatysty engizilgen sanksıalardan keıin bul másele otandyq dıstrıbútorlar men kınokórermendi mazalaǵany anyq. Degenmen birneshe kún buryn elimizdiń bas kınostýdıasy «Qazaqfılm» álemdik premeralardy dybystaýǵa daıyn ekenin málimdedi, dep habarlaıdy Almaty-akshamy.kz Qazaqtv.com saıtyna silteme jasap.
Sheteldik fılmderdi qazaqsha sóıletýge tehnıkalyq múmkindikter de, kásibı dýbláj akterleri de jetkilikti. Alaıda bul – qymbat proses. Sondyqtan ol qanshalyq óteledi? Mamandardy osy másele tolǵandyrady.
«Standart boıynsha bir fılmdi dýblájdaý sýbtıtrleýge qaraǵanda qymbat. «Qazaqsha sýbtıtrden bastasaq» degen usynys boldy. Aldaǵy ýaqytta bul fılmder bizge berilip jatsa, dýblájdan buryn sýbtıtrdi qolǵa alǵan jón. Nege? Túsindirip kóreıin. Birinshiden, dýblájǵa qaraǵanda áldeqaıda arzan. Fılm aǵylshyn tilinde túpnusqada júrse, sýbtıtr qazaq tilinde bolady. Bul kórermenderdiń tezirek aǵylshyn tilin meńgerip alýyna da sep bolmaq», - deıdi Sh.Aımanov atyndaǵy «Qazaqfılm» stýdıasynyń óndiris boıynsha vıse-prezıdenti Aıdar Batalov.
Bir fılmde ǵana álemdik kınojuldyzdardy qazaqsha sóıletý úshin shamamen 100 myń dollar qajet. Alaıda dýblájdyń qymbattyǵy Gollıvýd premeralarynyń prokatyna keri áser etetin jalǵyz qaýip emes. AQSH-tyń eń iri stýdıalarymen kelissózder júrgizý kerektigin umytpaý qajet.
«Bizge tikeleı kelisim nemese aımaqtyq dıstrıbútor arqyly 30-50 fılm berilse. Degenmen kúdik te bar, sebebi bizdiń naryq úlken emes», - deıdi Sh.Aımanov atyndaǵy «Qazaqfılm» stýdıasynyń óndiris boıynsha vıse-prezıdenti Aıdar Batalov.
Endi jaǵdaıdyń qalaı órbıtinin kútý kerek. Múmkindik ashylyp jatsa, artyqshylyqtary aıtpasa da túsinikti. Otandyq kınoındýstrıanyń damýynda iri serpilis bolary anyq. Bıyldyń ózinde «Qazaqfılm» keń prokatqa 5 jańa fılm daıyndaǵan. Onyń úsheýi – drama, ekeýi – komedıa jáne bir tarıhı fılm bar.