Kezdesý barysynda Qazaqstan men Eýropalyq Odaq arasyndaǵy keńeıtilgen seriktestik pen yntymaqtastyq aıasyndaǵy ózara is-qımyldardyń qazirgi jaǵdaıy men perspektıvalary talqylanyp, aımaqtyq qaýipsizdik máseleleri qarastyryldy.
Qazaqstan Prezıdenti adam quqyqtary jónindegi Eýropalyq Odaqtyń arnaýly ókili Imon Gılmor men Ortalyq Azıa boıynsha ókili Terı Hakalany qabyldady, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysy Eýropalyq Odaq delegasıasyna elimizdegi saıası jáne ekonomıkalyq reformalar, sondaı-aq Aýǵanstanǵa gýmanıtarlyq kómek kórsetý jóninde qabyldanǵan sharalar týraly aıtty.
Imon Gılmor Qazaqstan men Eýropalyq Odaq arasyndaǵy saıası jáne saýda-ekonomıkalyq yntymaqtastyqtyń deńgeıin joǵary baǵalap, seriktestikti odan ári nyǵaıtý maqsatynda baılanystardy jalǵastyrýdyń mańyzdy ekenin atap ótti.
Adam quqyqtary jónindegi Eýropalyq Odaqtyń arnaýly ókiliniń aıtýynsha, Qazaqstan Prezıdentiniń Brússelge aldaǵy sapary ekijaqty baılanystardy damytýda mańyzdy kezeń bolady.
Eýropalyq Odaq delegasıasy BUU-nyń Aýǵanstanǵa járdem berý jónindegi Mısıasynyń ofısin Almatyǵa ornalastyrý jáne aýǵan stýdentterine kómek kórsetý týraly Qasym-Jomart Toqaevtyń sheshimin erekshe atap ótip, Aýǵanstandaǵy jaǵdaıdy turaqtandyrýǵa qatysty Qazaqstan Prezıdentiniń aımaqtaǵy kóshbasshylyǵyn qoldady.
Imon Gılmor men Terı Hakala Prezıdentke erteń Almaty qalasynda ótetin «Ortalyq Azıa – Eýropalyq Odaq» azamattyq forýmyna Brússeldiń atynan qatysatynyn jetkizdi.