«Aqorda» rezıdensıasynda toǵyz eldiń tótenshe jáne ókiletti elshileriniń Qazaqstan Prezıdentine senim gramotalaryn tapsyrý rásimi ótti.
Senim gramotalaryn Kıpr Respýblıkasynyń elshisi Petros Nakýzıs, Japonıa elshisi Iasýmasa Iıdjıma, Qytaı Halyq Respýblıkasynyń elshisi Han Chýnlın, Avstrıa Respýblıkasynyń elshisi Andrea Baher, Býrkına-Faso elshisi Arıstıd Rapýgdondba Lúdovık Tapsoba, Laos Halyq Demokratıalyq Respýblıkasynyń elshisi Sıphandon Oıbýabýddı, Jańa Zelandıa elshisi Mark Djýlıan Treınor, Danıa Koróldiginiń elshisi Iesper Var, Slovenıa Respýblıkasynyń elshisi Alenka Sýhadolnık tabystady, dep habarlaıdy aqshamnews.kz Aqordaǵa silteme jasap.
Prezıdent elimiz jahandyq jáne óńirlik deńgeıdegi tynyshtyq pen qaýipsizdikti qoldaýǵa baǵyttalǵan beıbitsúıgish saıasat ustanatynyn jetkizdi. Bul – Qazaqstannyń syrtqy saıasattaǵy basty baǵdary.
Qasym-Jomart Toqaevtyń aıtýynsha, Qazaqstan álemdik aýqymdaǵy is-sharalar men kezdesýlerge uıytqy bola otyryp, halyqaralyq arenadaǵy belsendi oıynshyǵa aınaldy. Óńirdegi iri ekonomıkasy bar el retinde túrli memleketterden ınvestısıany kóptep tartyp otyr. Sondaı-aq Qazaqstan naryǵy ekonomıkalyq yntymaqtastyqqa ashyq.
Kezdesý sońynda Prezıdent elshilerdiń resmı túrde dıplomatıalyq mısıalarynyń bastalýymen quttyqtap, olardyń memleketter basshylaryna ystyq yqylasyn jetkizdi.