Prezıdenttiń aıtýynsha, Qazaqstan Qytaı Halyq Respýblıkasymen jan-jaqty strategıalyq yntymaqtastyqty odan ári tereńdetýge aıryqsha mán beredi.
Qasym-Jomart Toqaev Han Chýnlınniń dıplomatıalyq mısıasy ekijaqty qarym-qatynastar qarqyndy damyǵan kezeńge tuspa-tus kelgenin atap ótip, Qazaqstan tarapynyń Qytaımen ózara yqpaldastyqtyń barlyq baǵytyna tyń serpin berýge daıyn ekenine toqtaldy, dep habarlaıdy aqshamnews.kz Aqordaǵa silteme jasap.
Han Chýnlın QHR Tóraǵasy Sı Szınpınniń sálemi men yqylasyn jetkizip, eki el arasyndaǵy máńgi strategıalyq seriktestik joǵary deńgeıdegi belsendi saıası dıalogtyń arqasynda buryn-sońdy bolmaǵan dárejege kóterilgenine nazar aýdardy. Sondaı-aq elshi Qytaı men Qazaqstannyń san qyrly baılanysyn odan ári nyǵaıtýǵa jáne ózara yntymaqtastyqtyń joǵary dınamıkasyn saqtaýǵa bar kúsh-jigerin jumsaıtynyna sendirdi.
Kezdesý barysynda ekijaqty kún tártibiniń negizgi máseleleri, sonyń ishinde saýda-ekonomıkalyq, ınvestısıalyq jáne mádenı-gýmanıtarlyq salalardaǵy yqpaldastyqty damytý perspektıvalary talqylandy.