Memleket basshysy «Táýelsizdiktiń 25 jyldyǵy» monýmenti janyndaǵy alańda Naýryz meıramymen quttyqtap, sóz sóıledi.
Memleket basshysy Qasym-Jomart Toqaev «Táýelsizdiktiń 25 jyldyǵy» monýmenti janyndaǵy alańda Naýryz meıramyna arnalǵan merekelik is-sharaǵa qatysty. Bul týraly Aqordanyń baspasóz qyzmeti habarlady.
Almaty-akshamy.kz Memleket basshysynyń merekelik sharada sóılegen sóziniń tolyq mátinin usynady.
Naýryz – jyl basy, halqymyz ejelden toılaǵan kóktem merekesi. Bul – halyq asyǵa kútetin asa erekshe meıram, qystyń yzǵary qaıtatyn, kóktem shýaǵyn tógetin sát. Tabıǵat túlep, tirshilik qaıta jańaratyn mezgil.
Elimiz áz-Naýryzdy árdaıym yrysty yntymaqtyń bastaýyna balaǵan. Alystaǵan aǵaıyn Ulys kúni tatýlasyp, qaıta qaýyshqan. Jurt bir-birine aqjarma tilekterin aıtqan. Kópshilik ortaq dastarhannan dám tatyp, qarıalar jastarǵa batasyn bergen.
Babalarymyz Naýryz toıyn jasampaz eńbektiń meıramy sanaǵan. Bulaqtyń kózin ashyp, aǵash otyrǵyzǵan. Elge paıdasy tıetin ıgi ister atqarǵan. Bir sózben aıtsaq, Ulystyń uly kúni – jańa ómirdiń jarshysy.
Bul meıramdy halqymyz tutas el bolyp, bir ult bolyp túgel toılaıdy. Naýryz kezinde búkil elge ortaq qundylyqtar dáripteledi. Iaǵnı, áz-Naýryz – naǵyz halyqtyq meıram.
Baýyrmaldyq, janashyrlyq, syılastyq, otanshyldyq sıaqty qasıettiń bári osy Ulyq merekede kórinis tapqan. Biz – ata jolyn jalǵaǵan jurtpyz.
Men dál bir jyl buryn tyń bastama kóterdim. Elimizdi túbegeıli jańǵyrtý úshin aýqymdy reformalar usyndym. Halyq bul bastamalardy qoldady. Biz josparymyzdy bir jylda tabysty júzege asyrdyq.
Referendým arqyly Konstıtýsıaǵa mańyzdy ózgerister engizdik. Bılik júıesin qaıta jasaqtaý úshin mańyzdy saıası sharalar iske asyryldy.
Keshe ǵana ótken Májilis pen máslıhattar saılaýy – búkil reformalarymyzdy alǵa bastaıtyn óte mańyzdy qadam. Bul saılaý – aýqymdy ózgeristerdiń laıyqty jalǵasy. Osylaısha, memleketimiz jańa dáýirge qadam basty. Jalpy, elimizdiń jańa saıası kelbeti qalyptasty.
Tarıhı sát Ulystyń uly kúnimen tuspa-tus kelip otyr. Munyń zor sımvoldyq máni bar.
Jańa Qazaqstannyń búgingi beınesi áz-Naýryzben tolyq úndesedi, ıaǵnı Ulystyń uly kúninde qasıetti Otanymyz múlde jańa sıpatqa ıe boldy. Muny dúnıe júziniń kóptegen elderi moıyndap otyr.
Endi saıası júıesi tolyq jańǵyrǵan elimiz tyń qarqynmen damıdy. Bul reformalar ekonomıkanyń ósýine, halyq tabysynyń artýyna jol ashady. Reformalar mindetti túrde jalǵasyn tabady. Biz jan-jaqty damyǵan qýatty memleket bolamyz! Bul – negizgi maqsatymyz.
Azamattarymyzdyń kózqarasy ártúrli bolǵanymen, barlyǵynyń tilegi – bir. Bul – eldiń amandyǵy, memlekettiń jarqyn bolashaǵy. Biz osy ortaq maqsat jolynda jumylamyz.
Alda atqaratyn jumys kóp. Birligimizdi bekemdep, bir el bolyp iske kirissek, alynbaıtyn asý joq. Men jasampaz halqymyzdyń keleshegi jarqyn bolady dep senemin. Memlekettiń múddesi – bárinen bıik.
Biz jastarymyzǵa qamqor bolyp, olarǵa barynsha jaǵdaı jasaımyz. Men jastarǵa senemin! Olarǵa zor úmit artamyn!
El bolashaǵy – óskeleń urpaqtyń qolynda. Endeshe, týǵan elimizdi birge damytaıyq, aǵaıyn!
«Birlik túbi – bereke» deıdi halqymyz. Qoǵamda kelisim jáne tatýlyq bolsa, elimiz kózdegen maqsatyna jetedi.
Bizdiń maqsatymyz – aıqyn. Bul – Ádiletti Qazaqstandy qurý. Osy jolda bárimiz bir kisideı jumylaıyq, ardaqty aǵaıyn!
Bıyl qasıetti Ramazan aıy Ulystyń uly kúnimen qatar keldi. Oraza ustaıtyn jamaǵattyń nıeti qabyl bolsyn! Ár shańyraqqa qydyr qonyp, baq darysyn! Jańa jyl qut-bereke ákelsin!
Ulys oń bolsyn! Aq mol bolsyn!