Prezıdent Almatyda seısmoaýdıt júrgizý josparyn maquldady
Memleket basshysyna Almaty qalasynyń áleýmettik-ekonomıkalyq jaǵdaıy týraly esep berildi. Bıyl qańtar aıynda qalanyń qysqa merzimdi ekonomıkalyq ındıkatory ınvestısıalyq jáne iskerlik belsendiliktiń ósýi esebinen 136,7 paıyzǵa deıin artty. Negizgi kapıtalǵa quıylǵan ınvestısıa kólemi 21,9 paıyzǵa ulǵaıdy. Ekonomıkanyń damý qarqynyn saýda, kólik jáne óńdeýshi ónerkásip salalaryndaǵy ósim qamtamasyz etti.
Erbolat Dosaev Qasym-Jomart Toqaevqa qalanyń 2040 jylǵa deıingi jańa Bas josparyn ázirleýdiń negizgi tásilderi jóninde baıandady. Ony daıyndaý barysynda Memleket basshysynyń 2022 jylǵy 16 qarashada Almaty jurtshylyǵymen kezdesýinde aıtqan tapsyrmalary eskerilgen.
Prezıdent qalanyń seısmıkalyq qaýipsizdigin qamtamasyz etý boıynsha usynylǵan sharalar men bıylǵy ekinshi jartyjyldyqta seısmoaýdıt júrgizý josparyn maquldady. Bul shahardaǵy nysandardyń qujattaryn jańartýǵa múmkindik beredi.
Memleket basshysyna qala ishinde «jasyl dálizder» jasaý úshin Dúnıejúzilik bankpen birlese ázirlenip jatqan is-áreket jospary boıynsha aralyq esep berildi. Bul bastama aıasynda jasyl jelegi mol aýmaqtardyń aýdanyn ulǵaıtý, sonyń ishinde ózen arnalary men kanaldar boıyn kógaldandyrý josparlanyp otyr.
Prezıdentke Almatynyń Indýstrıalyq aımaǵynda avtomobıl klasterin qurý barysy baıandaldy.
Qasym-Jomart Toqaev naqty tabystyń artýyn qamtamasyz etýge jáne qaladaǵy ekologıalyq ahýaldy jaqsartýǵa baǵyttalǵan sharalardy kúsheıtý jóninde tapsyrma berdi.
Foto: akorda.kz