Mýzeı esikteri 18 mamyrda saǵat 14.00-den 00.00-ge deıin ashyq.
2023 jylǵy 18 mamyrda Ábilhan Qasteev atyndaǵy Qazaqstan Respýblıkasynyń Memlekettik óner mýzeıi «MEDIKER» medısınalyq kompanıasynyń seriktestigimen MÝZEIİ TÚNİ 2023 jobasyn usynady, dep habarlaıdy Almaty-akshamy.kz
Aksıa Halyqaralyq mýzeıler kúnine oraılastyrylǵan. Osy túnde mýzeı alańdarynda Sergeı Chervákovtyń pantomıma teatrynyń qoıylymdaryn, «Lumiere» shoýyn, Irına Vasıleva men Elena Hovanskaıanyń «Ot Vınta» atty bas kıimderdiń avtorlyq koleksıasynyń sán defılesin, T. Júrgenov atyndaǵy Qazaq ulttyq óner kolejiniń akterlik sheberlik fakúlteti stýdentteriniń teatrlyq etúdterin kórýge bolady. Keshtiń erekshe qonaǵy –Venera Ýrazbekova «Álem mýzykasy» baǵdarlamasyn usynady.
Sondaı-aq, is-sharanyń mýzykalyq bezendirilýin Almaty qalasy ákiminiń konserttik orkestri, «Murager» dombyrashylar ansambli, «Aq-Darıǵa» qobyzshylar ansambli, pıanıs Lazzat Álmuhambetova, Almaty-Qazaqstan Úndi klasıkalyq bı jáne ıoga ortalyǵy, Daryndylar akademıasy-KZ ulttyq qundylyqtardy qoldaý ortalyǵy qamtamasyz etedi.
Jumabekova Gúlaıym, Ábilhan Qasteev atyndaǵy QR MÓM dırektory: «Mýzeı jalpy belgilengen taqyrypty ustana otyryp, jyl saıyn osy halyqaralyq aksıaǵa qatysyp turady. Biz mýzeıge degen qyzyǵýshylyqty arttyrý úshin arnaıy, shyǵarmashylyq sheshimderdi qoldanýǵa tyrysamyz. ICOM-nyń (Halyqaralyq mýzeıler keńesi) 2023 jyly jarıalaǵan taqyryby «Mýzeıler, turaqtylyq jáne ál-aýqat». Osyǵan baılanysty biz densaýlyqty saqtaýǵa qatysty ózekti taqyrypty alǵa tarta otyryp, «Emdeý óneri» qorynan kórme ashamyz. Ekspozısıada qazaqstandyq jáne sheteldik ónerdi beıneleıtin keskindeme, grafıka jáne músin týyndylary usynylǵan. Avtorlar óz eńbekterinde medısına qyzmetkerleriniń eren eńbegine shyn júrekten qurmetin bildirgen. Mýzeı túni mýzeı salasynda qyzmet atqaratyn mamandar men kórermenderdiń keń aýqymy úshin jyldyń basty oqıǵasy bolyp tabylady».
Qasymova Oryntaı, "Medıker" JSHS Basqarma tóraǵasynyń orynbasary: «Biz Qazaqstandaǵy halyqqa bilikti medısınalyq qyzmet kórsetetin eń iri medısınalyq kompanıamyz jáne sońǵy jıyrma jyl ishinde elimizdiń barlyq óńirlerinde medısınalyq ınfraqurylym qura otyryp, Qazaqstannyń densaýlyq saqtaý salasyn damytýǵa únemi ınvestısıa salyp kelemiz. Osy arqyly sapaly, qaýipsiz jáne tıimdi medısınalyq qyzmetterdiń qoljetimdiligin qamtamasyz etemiz. Mediker kompanıasy korporatıvtik-áleýmettik jaýapkershilik aıasynda, sondaı-aq BUU-nyń Jahandyq shartynyń qatysýshysy retinde azamattardy óz densaýlyǵyn óner jáne mýzeımen seriktestik qarym-qatynas ornatý arqyly saqtaý jáne aldyn alý qajettiligi týraly habardarlyqty arttyrý maqsatynda bıylǵy jyly Mýzeı túni sıaqty mańyzdy mádenı is-sharaǵa demeýshilik jasaıdy. Biz mádenı jobalarǵa ınvestısıa salý arqyly ónerdi nasıhattap, sulýlyqtan lázzat alyp qana qoımaı, jalpy qoǵamymyzdyń damýyna jáne órkendeýine jaǵdaı týǵyzatynymyzǵa senimdimiz.
«Mýzeı túni» ̶ biz úshin óner men medısına arasyndaǵy baılanysty pash etetin tamasha múmkindik. Sebebi, óner men medısınanyń tamyry ortaq ̶ bul eki sala shyǵarmashylyq jáne zerdeli oılaý qabiletiniń joǵary dárejesin talap etedi. Ónerde medısına biliminiń jáne daǵdylardyń evolúsıasyn kórýge bolady. Ár túrli dáýirlerdegi anatomıa sabaqtary, pasıent pen dárigerdiń ózara árekettesýi, adam ómiriniń metafızıkalyq maǵynalary, onyń náziktigin fálsafalyq turǵydan túsiný. Ataqty dárigerlerdiń beıneleri olardyń portretterin jasaýǵa shabyttandyrady. Medısınalyq tájirıbede óner sabaqtary, máselen: art-terapıasy, túrli tústerdi qabyldaý jáne ǵajaıyp áýenderdi tyńdaý áseri kóptegen aýrýlardy emdeýge yqpal etedi, al tamasha óner týyndylary ishki dertińdi basady. Qazirgi zaman ónerin búgingi álemniń problemalaryn bildirý jáne olardy sheshýge múmkindik beretin joldaryn izdestirý quraly retinde kóre otyryp, biz ózindik kórkemdik-ǵylymı alań qurdyq, osy arqyly sýretshiler men ǵalymdar arasynda turaqty damý men ál-aýqatty saqtaý máselelerinde nátıjeli yntymaqtastyq úshin múmkindikterdiń bar ekendigin rastadyq». «Mýzeı túni – 2023» jobasy aıasyndaǵy is-sharalar baǵdarlamasyna kórmeniń ashylýy, ekskýrsıalar, kvestter, sheberlik saǵattar, balalar men eresekterge arnalǵan is-sharalar, derekti fılmder kórsetilimi, avtorlyq buıymdar jármeńkesi kiredi.