Almaty mektepteriniń birinde birneshe kún buryn oqýshy qyzdyń synyp jetekshisine qatysty shaǵym aıtylǵan vıdeo tarady.
Ol jerde 9-synyp oqýshysy óziniń synyp jetekshisin «óte qatygez apaı» dep sıpattaǵan. Aıtýynsha, muǵalim oǵan qol kóterip, julqylaǵan. Daýys kóterip, kóńilge keletin sózder aıtqan.
Osy máslege baılanysty búgin qaladaǵy №133 mektep-gımnazıasynda kámelet jasqa tolmaǵandardyń quqyǵyn qorǵaý jónindegi vedomstvoaralyq komısıa otyrysy ótti. Bul jaǵdaıdyń jaı-japsaryn atalǵan mekteptiń dırektory Sabyrkúl Orazbekovaǵa habarlasyp bildik. Dırektordyń sózinshe, oqýshyǵa qol kóterdi dep jala jabylǵan muǵalimge qatań sógis berilip, ol synyp jetekshiligi men óziniń qaramaǵynda bolǵan 9-synypqa sabaq berýden shettetilgen. Biraq mekeme basshysy áli de sol buǵan deıin aıtylǵan ýájinde, muǵalim tarapynan balaǵa qol kóterý bolmaǵan deıdi.
«Muǵalim oqýshyǵa qattyraq daýys kótergen shyǵar. Biraq, balaǵattamaǵan, eshkimdi urmaǵan. Osy kezge deıin bul muǵalimge qatysty eshqandaı shaǵym bolǵan emes. Jumysyna jaýapty, óz isine adal maman», - deıdi №133 mektep-gımnazıasynyń dırektory Sabyrkúl Orazbekova.
Degenmen syńar egizdiń anasy Aqmaral Ibadýllaeva muǵalimniń qyzyna qol kóterip, julqylaǵanyn aıtýda. Saldarynan oqýshy ıyǵynan jaraqat alypty.
«Bul birinshi jyl emes. Meniń talabym - synyp jetekshimizdi muǵalimdik qabiletinen aıyrý kerek. Bul mektepte jumys istegenin qalamaımyn. Meniń qyzym 9 maıdan beri sabaqqa kelmeıdi. Psıhıkasyn bárin qurtqan, nevrologıcheskıı ýje aýrý. Qyzyma qatty zaqym tıgen, ýshıbter bar. Qyzymdy búkil ata-ana men oqýshylardyń arasynda synyp jetekshisi qarsy qoıyp otyr», - deıdi ata-ana Aqmaral Imadýllaeva.
Shyn mánisinde 9-synyptyń basqa ata-analary muǵalimdi qorǵashtap, ony jaqtap otyr.
«Muǵalimder tarapynan, mektep tarapynan qaraýsyz qalyp, eshqandaı jumystar júrgizilmeı, balalar arasynda osyndaı nárseler oryn aldy degenmen kelise almaımyn. Balaly úıdiń urlyǵy jatpaıdy deıdi. Eger osyndaı jaǵdaı bolsa, tek qana Baıan ǵana januıasyna aıtyp baryp, basqa balalar aıtpaı qalý múmkin emes qoı», - deıdi ata-ana Láılá Esalıeva.
«Synypta kedergi jasap, óziniń sabaq oqyp otyrǵan synyptastaryna kóp mınýs jaǵdaı jasaıdy eken. Ózi bastaıdy. Muǵalimderge sóz qaıtarady. Sabaqta neshe túrli sózder aıtyp otyrady. Áleýmettik jelige shyǵyp turǵan vıdeolaryndaǵy urý, ursý, synypta osylaı jasaý degen, meniń qyzym ashyq «mama, ondaı bolmaıdy» deıdi. Aıtqany jalǵan», - deıdi ata-ana Jazıra Baımuqan.
Qazir synyp jetekshiliginen shettetilgen muǵalim 15 jyldan beri qazaq tili men ádebıeti páninen sabaq berip keledi.
№133 mektep dırektory Sabyrkúl Orazbekova bala quqyǵy birinshi orynda ekenin aıtýda. Qazir osy jaǵdaıǵa baılanysty balalarmen de, muǵalimmen de psıholog, nevropatolog mamandar jumys istep jatyr.
Osy jaǵdaıǵa baılanysty basqa da ata-analardyń oıyn surap kórdik. Árkim máseleni tek birjaqty qarap, birjaqty sheshim qabyldaǵan durys emes deıdi. Oqýshy - muǵalim - mektep - ata-analar arasynda osyndaı daý-damaı sońǵy ýaqytta jıilep ketkeni ras.
- Qazir ózi bala kishi bolsyn, úlken bolsyn, balaǵa qarap sóz aıta almaıtyn boldyq. Psıhologtardyń sózin tyńdasaq, balanyń betin qaǵýǵa bolmaıdy. Ursýǵa bolmaıdy. Qol kóterýdi bylaı qoıǵanda. Balanyń betin qaqpasa, eskertý jasamasa oǵan qalaı baǵyt-baǵdar beremiz sonda?!
- Qandaı jaǵdaı bolmasyn muǵalim ustamdylyq tanytyp, qatty ashý shaqyrmaǵany durys. Óziniń ashýyn basa almasa, ol qalaı muǵalim bolyp júr. Balanyń tilin tabý kerek.
- Jaǵdaıǵa qaraı, bala kináli bolsa, eskertý jasap, qattyraq aıtqanda turǵan eshteńe joq dep oılaımyn. Tipti tyńdamasa, ata-anasyna aıtý kerek. Biraq qol kóterip, julqyp-silkileý durys emes.
Birjaqty pikir bolmasyn dep ózge mektep ustazdarynan da osyndaı jaıttarǵa qatysty oılaryn surastyryp kórdik.
«Qazir ata-analardyń kóbi muǵalimge qaraǵanda balasynyń sózine senedi jáne sonyń sózin sóıleıdi. Keıde daýys kóterip sóıleıtin sátter bolady. Sebebi keıbir balalarǵa qattyraq aıtpasań, aıtqanyńdy oryndaı qoımaıdy. Ustazdar balalardyń janyn jaralaıtyn sóz aıtyp, qol kóteretin árekketke barady dep aıta almaımyn. Kerisinshe, qandaı jaǵdaı bolmasyn balanyń janyn túsinýge, qoldaý kórsetýge tyrysady», - deıdi Janar esimdi qazaq tili muǵalimi
«Qazir shamasy jetken adamnyń bári muǵalimdi aıyptap shyǵatyn boldy. Úılerinde betin qaqpaı ósirgen balalaryna eshqandaı eskertý jasap, túzete almaıtyndaı boldyq. Kerek kezinde muǵalimniń qataldyq tanytýy kerek. Osyny kóbi, ásirese balalar shekten tys qattylyqpen shatastyrady. Qattyraq sóıleý arqyly balany shıratyp alǵysy keletin bolýy kerek», - deıdi Nurgúl esimdi kópjyldyq tájirıbesi bar muǵalim.