Qurylystyń bastalýyna Atyraý oblysyna jumys saparymen barǵan Asqar Mamın qatysty.
QR Premer-Mınıstri Asqar Mamın munaı-gaz hımıasy jáne munaı-gaz mashınasyn jasaý salalaryndaǵy iri ınvestısıalyq jobalardyń iske asyrylý barysyn tekserdi, dep habarlaıdy Almaty-akshamy.kz Primeminister.kz saıtyna silteme jasap.
Úkimet basshysy Qashaǵan ken ornynda gazdy keshendi daıyndaý qondyrǵysy – gaz óńdeý zaýytynyń qurylysyn bastap berdi. Kásiporynnyń óńdeý qýaty jylyna 1 mlrd m³ deıin shıki kúkirtti gazdy quraıdy, odan 815 mln m³ taýarlyq gaz jáne 119 myń tonna suıytylǵan gaz, 212 myń tonna kúkirt jáne 35 myń tonna gaz kondensaty óndiriletin bolady. Ony 2023 jylǵy tórtinshi toqsanda paıdalanýǵa berý kózdelgen.
Joba elimizdiń gaz óńdeý salasyn damytýǵa serpin beredi. Qashaǵanda munaı óndirý deńgeıin táýligine 450 myń barelge deıin ulǵaıtýǵa, eldi odan ári gazdandyrý úshin resýrstyq bazany keńeıtýge jáne munaı-gaz óndirisiniń ekologıalyǵyn arttyrýǵa múmkindik beredi. Qurylys kezeńinde munda 2500-ge deıin ýaqytsha, al paıdalaný kezeńinde 600 turaqty jumys orny qurylady.
Premer-Mınıstr jylyna 500 myń tonna polıpropılen óndiretin Qazaqstandaǵy alǵashqy Integrasıalanǵan gaz-hımıa kesheniniń qurylys barysyn tekserdi. Jobany «Qazaqstan Petrokemıkal Indastrız (KPI)» JSHS júzege asyrady. Investısıalardyń jalpy kólemi $2,6 mlrd quraıdy. Ony 2022 jylǵy naýryz aıynda paıdalanýǵa berý josparlanǵan. Kásiporynda 630-dan astam turaqty jumys orny ashylady.
Qazirgi ýaqytta joba kestesi boıynsha jalpy progres 87,19%-dy quraıdy. Qurylysqa 39 qosalqy merdiger kompanıa tartylǵan, onyń 36-sy — qazaqstandyq. Úkimet basshysy bıyl sáýir aıynda polıpropılen óndiretin ıntegrasıalanǵan gaz-hımıa kesheniniń jumysyn qamtamasyz etý úshin azot jáne syǵylǵan qurǵaq aýa shyǵaratyn qondyrǵysynyń qurylysyn aıaqtaǵan «Er Lıkıd Qarabatan Teh Gazy» qazaqstan-fransýz birlesken kásipornyna bardy. Zaýyttyń qýattylyǵy 8 myń nm3/s azot jáne 8,1 myń nm3/s syǵylǵan qurǵaq aýany quraıdy.
Asqar Mamın 2020 jylǵy tamyzda paıdalanýǵa berilgen qýaty jylyna 36 myń m² greıtıng jáne 60 myń tonna myryshtaýdy quraıtyn «Atyraýmunaımash» JSHS greıtıng jáne ystyqtaı myryshtaý sehynyń jumysymen tanysty. «Kaspıı munaı» JSHS aralaý barysynda Premer-Mınıstrge Atyraý oblysynyń Jylyoı aýdanyndaǵy «Aırankól» ken ornyn 2019-2021 jyldary júrgizilgen sıfrlandyrýdyń nátıjeleri tanystyryldy – munaı óndirý 10%-ǵa artty, shyǵyndar 30%-ǵa azaıdy, operasıalyq qyzmet 80%-ǵa jetildirildi, munaı qaldyqtarynyń kólemi qysqartyldy, pandemıa kezeńinde ken ornyn qashyqtan baqylaý jáne basqarý múmkindigi engizildi.