Kúdikti azamat Almatyǵa jetkizildi.
Polısıa mamandary zańsyz bireýdiń kóligin Shyǵys Qazaqstan oblysyna aıdap áketken azamatty ustady, dep habarlaıdy Almaty-akshamy.kz Almaty qalalyq polısıa departamentiniń baspasóz qyzmetine silteme jasap.
Polısıa málimeti boıynsha, Almaly aýdanynyń turǵyny polısıaǵa kóliktiń joǵalyp ketkendigi týraly aryzben júgingen. Aryzdanýshynyń aıtýynsha, onyń «Toıota Súrf» markaly kóligi Brýsılovskıı kóshesinde ornalasqan úıdiń turaǵynan joǵalyp ketken.
Polıseılerdiń aıtýynsha, jedel izdestirý is-sharalary barysynda kólik tabyldy. Mamandar ony 1989 jyly týǵan Shyǵys Qazaqstan oblysynyń turǵyny A.esimdi azamattan tárkilep aldy.
«Ol Óskemenge bótenniń kóligimen ketip qalǵan, sol jerde urlanǵan kólikti satýdy josparlaǵan. Jedel ýákilder taǵy eki sybaılasyn Almatyda ustady. Bul 37 jastaǵy F. jáne N.esimdi azamattar. Tergeý barysynda óte qyzyqty fakt paıda boldy - kúdiktilerdiń biri osy turǵyn úı kesheninde kúzetshi bolyp jumys istegen jáne ózine unaǵan kóliktiń turaqta birneshe jyl boıy qozǵalyssyz turǵanyn bilgen. Ol dostaryn urlaý arqyly qosymsha aqsha tabýǵa shaqyrǵan. Aıǵaqty zattar Almatyǵa ákelindi, kúdikti de osynda jetkizildi. Aıdap áketý faktisi boıynsha Almaly aýdandyq polısıa basqarmasy tergeý júrgizip jatyr», – dedi Almaty qalalyq PD krımınaldyq polısıa basqarmasynyń bastyǵy, polısıa podpolkovnıgi Qýatbek Naýatov.
