Qaryzyn keshirýdi suraǵandardyń basym kópshiliginiń ótinishi qabyldanbady

Avtor Almaty-akshamy.kz.
05:22, 22 tamyz 2023

Sýret: ashyq derekkóz

Naýryz aıynan beri ózin bankrot dep jarıalaýdy suraǵan 51 myńnan astam el azamatynyń ótinishi qabyldanbady

Kirister komıteti árbir keri qaıtarylǵan qujatqa naqty sebep bar dep otyr. «Nesıe tóleýge múmkindigim joq», - degen keıbir boryshkerlerdiń depozıtte jıǵany bar bolyp shyqqan, dep habarlaıdy Almaty-akshamy.kz qazaqstan.tv-ge silteme jasap.

Kredıt tóleı almaıtyndardy qutqaratyn arnaıy zań qabyldanǵannan keıin alǵashqylardyń biri bolyp ótinish bergen almatylyq Gaýhar Daýyljanqyzy. Dekrettik demalysqa shyqqannan keıin jumys isteýge múmkindigi bolmaǵan kelinshek bankrottyq týraly zań talaptaryna kónip, 1 mıllıon teńgege jýyq qaryzyn keshirýdi suraǵan.

«Ol qarajat úıge kerek boldy. Men ózim bankrottyqqa naýryz aıynda birinshi bolyp tapsyrdym. Ol kezde men eseptemeppin 12 aıǵa tolmapty. 15-20 kúnniń ishinde ótinishim qabyldanbady degen habar aldym. Úsh aıdan keıin qaıtadan kelińiz dedi. Keldim qaıtyp tapsyrdym. Qabyldandy», -deıdi qala turǵyny Gaýhar Ábdibaeva.

Iaǵnı bank aldyndaǵy bereshegin úzdiksiz 1 jyl tóleı almaǵandardyń ótinishi birden qabyldanady. Kirister komıtetiniń málimetinshe, ózin bankrot dep tanýdy suraǵandardyń kóbi dál osy merzimge jetpeı jatyp ótinish berip jatyr eken. Sondaı-aq qaryzy shekti somadan, ıaǵnı 5 mıllıon 520 myń teńgeden asyp ketkender de bereshegin keshirýdi suraǵan. Tipti, atynda tirkelgen múlki, ashylǵan depozıti barlar da nesıeni qaıtaratyn múmkindigimiz joq dep jazǵan deıdi mamandar.

«Keıbir azamattardyń atynda JSHS bar ekendigi, sonymen qatar kásipkerligi bar ekendigi anyqtaldy. Sonymen qatar baǵaly qaǵazdary, depozıtteri bar ekendigi anyqtaldy. Keıbir azamattar men bul nesıemdi tólemegenime 12 aıdan asyp ketti dep aıtady. Biraq belgili bir sebeppen onyń nesıe tólemin bireý jasap otyrǵany anyqtalady. Árıne, bul máseleni azamat ózi kóterip, ári qaraı bankke habarlasyp shotyna kimniń nesıe ótegenin anyqtaı alady», -deıdi QR Qarjy mınıstrligi memlekettik kirister komıtetiniń ókili Aınur Sartaeva.

Al nesıeni tóleı almaı júrgende shotyńyzǵa tanysyńyz qarajat jiberse, aqsha birden merzimi ótip ketken tólemge dep aýdarylatyny belgili. Kredıt jartylaı ótelse de, bankrottyqqa iligý múmkin emes. Sondyqtan áleýmettik jaǵdaıyńyzdy bankke baryp, aldyn ala eskertýińiz qajet deıdi mamandar. Osyndaı san túrli sebeptiń saldarynan alty aıdyń ishinde 63 myńǵa jýyq azamattyń 80 paıyzynyń ótinishi keri qaıtarylǵan. Desek te, olar jiberilgen qatelikterdi túzep úsh aıdan keıin qaıtadan bankrottyqqa ótinim berýge quqy bar.

Aıta keteıik, osy kúnge deıin bankrot dep tanylǵan 10 myń adamnyń jartysy sońǵy 5 jyldan beri nesıesin jaba almaı júrgender eken.