12 myń almatylyq qarjylyq saýattylyq boıynsha oqýdan ótýge múmkindik alady. «Qaryzsyz qoǵam» jobasy bastalǵannan beri megapolıstiń 3500 turǵyny óz qarjysyn basqarýdy úırendi. Bul aqparatty Almaty qalasynyń Óńirlik komýnıkasıalar qyzmetiniń alańynda jobanyń bastamashylary aıtty, dep habarlaıdy almaty-akshamy.kz.
Amanat partıasy iske qosqan «Qaryzsyz qoǵam» jobasy problemalyq kredıtter men qaryzdar saldarynan qıyndyqtarǵa tap bolǵan qazaqstandyqtardy qoldaýǵa baǵyttalǵan. Almatyda joba 2024 jyldyń 5 aqpanynan bastap qalalyq ákimshilikpen birlesip júzege asyrylýda.
Brıfıńte sóz sóılegen Amanat partıasynyń Almaty qalalyq fılıaly tóraǵasynyń orynbasary Qýanysh Tólepov Memleket basshysy óziniń Qazaqstan halqyna Joldaýynda jobanyń mańyzdylyǵyn jáne ony elimizdiń barlyq óńirlerinde keńeıtý qajettigin atap ótti.
Bıyl joba boıynsha elimizdiń barlyq óńirinde 200 myń adamdy, onyń ishinde Almaty qalasynyń 12 myń turǵynyn oqytý josparlanyp otyr. Qazirgi ýaqytta qala ákimdigimen birlese qalamyzdyń 6 meken-jaıy boıynsha oqytý ótkizilýde. Almaty qalasyna 6 qarjy sarapshysy bekitilgen. Olar túske deıin jalpy baǵdarlama, tústen keıin qatysýshynyń qalaýy boıynsha jeke keńester beredi. Joba qalanyń 8 aýdanyn qamtıdy. Oqytý 5 kún bolady. Osy ýaqyt ishinde qatysýshylar otbasylyq búdjetti júrgizýdi, shyǵyndaryn basqarýdy, nesıelik qaryzdardy merziminen buryn óteý boıynsha usynystar alýdy, tıimdi sharttarmen nesıe tańdaýdy, depozıtterdiń ártúrli sharttarymen tanysýdy, iri satyp alýlardy josparlaýdy úırenedi», - dedi Q.Tólepov.
Joba bastalǵannan beri qazirgi ýaqytqa deıin 11 aǵyn oqytylyp, barlyǵy 3500-den astam qatysýshy qarjylyq saýattylyq boıynsha oqytýdan ótti.
Sondaı-aq oqytý sheńberinde qarjy sarapshylary jeke konsýltasıalar ótkizedi jáne qatysýshylardyń qalaýy boıynsha óz bıznesin ashý úshin memlekettik granttyq jáne kredıttik baǵdarlamalarǵa bıznes-jospar jazýǵa kómektesedi. Joba aıasynda qatysýshylar bilikti zań kómegin alyp, shottaryna tyıym salynǵan, qaryzdary kolektorlyq kompanıaǵa satylǵan jaǵdaıda nemese nesıelik qaryzdy qaıta qurylymdaý boıynsha kómekter ala alady. Bul oqýdan oflaın formatta bir topta 100 adamǵa deıin ótýde.
«Qaryzsyz qoǵam» jobasy qaryzǵa belsheden batyp, úmitin úzgenderge naqty qoldaý kórsetedi. Joba qolda bar qarajatqa ómir súrýge, qajetsiz nesıeden bas tartýǵa úıretedi. Bárin osy jobaǵa qatysyp, óziniń qarjylaı saýattylyǵyn arttyrýǵa shaqyramyn», - dedi Q.Tólepov.
Oqytý azamattarǵa qarjylyq máselelerdi jaqsyraq basqarýǵa jáne aqshalaryn basqarýda negizdelgen sheshimder qabyldaýǵa kómektesedi dep kútilýde. Bul óz kezeginde qoǵamdaǵy jalpy ekonomıkalyq turaqtylyqty jaqsartýǵa yqpal etedi.
Tegin kýrstar men oqýdan ótýge nıet bildirýshiler turǵylyqty jeri boıynsha Amanat partıasynyń aýdandyq fılıalyna nemese aýdan ákimdikterine júgine alady. Qatysýshylarǵa yńǵaıly bolý úshin qogamfin.kz onlaın-platformasy da iske qosyldy, ol arqyly siz oqý kýrstaryna jazylyp, paıdaly materıaldar men beıne sabaqtardy júktep alýǵa bolady.