120-dan astam elde 3 mıllıon gektar jer temeki óndirý úshin paıdalanylady
Temeki ónimderin paıdalaný saldarynan jyl saıyn segiz mıllıon adam kóz jumady, dep habarlaıdy Almaty-akshamy.kz El.kz aqparat agenttigine silteme jasap.
Soǵan qaramastan, álem úkimetteri temeki óndirýdi qarjylandyrýdy toqtatpaı tur. Qazaqparattyń jazýynsha, 31 mamyrda atap ótiletin Dúnıejúzilik temekige qarsy kúres kúni qarsańynda DDSU basshysy Tedros Gebreıesýs málimdedi.
Ol memleketterdiń bıligin mıllıondaǵan adamǵa azyq bolatyn paıdaly daqyldardy ósirýge shaqyrdy. DDSU «Tabak emes, tamaq ósirińizder» degen taqyryppen baıandama jarıalady. Onda temeki óndirisiniń jaı-japsary áshkerelenedi. Onda jalǵan toptar arqyly temeki óndiretin fermerlerdiń múddesin kóterip, fermerlerdi «boryshtyq quldyqta» ustap, temeki óndirisin nasıhattap, onyń ekonomıkalyq paıdasyn ásireleý týraly aıtylǵan.
DDSU sarapshylarynyń pikirinshe, temekiniń zıany tutynýshylarǵa ǵana áser etpeıdi. Ony óndirý prosesi kezinde fermerler sozylmaly ókpe aýrýyna shaldyǵyp, nıkotınmen (jasyl tabak aýrýy dep te atalady) ýlanady. Oǵan qosa temeki óndirisinde álem boıynsha mıllıonnan astam bala jumys isteıdi.
«Temekiniń ornyna azyq-túlik ónimderin ósirý arqyly biz densaýlyqty birinshi orynǵa qoıyp, ekojúıeni saqtaımyz, óndiristik qaýipsizdikti nyǵaıtamyz», - dedi dáriger Tedros.
Ol álemde 300 mıllıonnan astam adam azyq-túlik ónimderiniń jetispeýshiliginen zardap shegetinin eske saldy. Soǵan qaramastan 120-dan astam elde 3 mıllıon gektardan astam jer temeki óndirý úshin paıdalanylady, onyń ishinde adamdar ash júrgen elder de bar.
Búgingi kúnge deıin temeki óndirisi Azıa men Ońtústik Amerıkanyń máselesi dep eseptelip keldi. Álemdegi temeki óndirisiniń 55 prosenti Brazılıa, Qytaı men Úndistanǵa tıesili.
Eýropa aımaǵynda tabak ónimderin óndirý boıynsha kóshbasshylar - Gresıa, Italıa, Ispanıa, Polsha, Serbıa jáne Túrkıa.
Jyl saıyn 31 mamyrda DDSU men onyń seriktesteri Dúnıejúzilik Temekige qarsy kúres kúnin atap ótedi. Onyń maqsaty – temeki ónimderin paıdalanǵannan keıin paıda bolatyn máselelerge nazar aýdartyp, onymen tıimdi kúres sharalaryn uıymdastyrý.
Jyl saıyn DDSU temekini baqylaý salasynda jetistikke jetken adamdarǵa marapat tabystaıdy. Bıyl bul marapatty kenıalyq kásipker Sprına Robı Chacha aldy. Ol temeki óndirýdi toqtatyp, burshaq ósirýge kóshken jáne basqa da júzdegen fermerge osyndaı tásildi úıretti.