Oqý-jattyǵýǵa 15000-nan asa áskerı qyzmetshi qatysty
Qazaqstannyń Qarýly Kúshterinde jaýyngerlik jattyǵýǵa barynsha jaqyndatylǵan jaǵdaıda bólimshelerdiń dalalyq mashyǵy men úılesimdiligin jetildirý maqsatynda batalóndyq (dıvızıalyq) taktıkalyq oqý-jattyǵý ótti, dep habarlaıdy Almaty-akshamy.kz.
Barlyq áskerı bólimder men quramalardy tolyq jaýyngerlik daıarlyqqa keltire otyryp, batalóndyq (dıvızıalyq) taktıkalyq oqý-jattyǵý ótkizildi. Atalǵan oqý-jattyǵýdyń basty maqsaty – jeke quramdy úılesimdi is-qımyl jasaýǵa mashyqtaý, bilimdi is júzinde bekitý, daǵdylar men eptilikti nyǵaıtý. Jaýyngerlik jaǵdaıǵa barynsha jaqyndatylǵan jattyǵý barysynda komandırler bólimshelerdi sheber basqarýdy jetildirdi.
Bólimder men quramalardyń jeke quramy dabyl boıynsha kóterilip, bólimshelerdi jaýyngerlik ázirliktiń joǵary deńgeıine keltirý sharalary iske asyryldy. Turaqty ornalasý pýnktiniń áskerı qyzmetshileri oqý-jattyǵý polıgondaryna jaýyngerlik tehnıkamen marsh jasap, onda atys jáne arnaıy taktıkalyq tapsyrmalardy oryndady.
– Oqý-jattyǵýda komandırlerdiń derbes sheshim qabyldaýyn qajet etetin is-qımyl, bólimsheler men áskerı bólimderdi basqarý boıynsha kenetten týyndaıtyn mindetterdi oryndaýdy talap etetin kúrdeli, standartty emes jaǵdaı jasaldy, – dep atap ótti Bas shtab Jaýyngerlik daıarlyq departamenti bastyǵynyń orynbasary, polkovnık Vladımır Kan.
Jaýyngerlik atys jattyǵýlary kezinde utymdy taktıkalyq is-qımylǵa, qarý-jaraqty urysta sheber jáne tıimdi qoldanýǵa jáne bólimshelerdiń atysyn basqarýǵa, sondaı-aq qaýipsizdik sharalaryn qatań saqtaýǵa basa nazar aýdaryldy. Oqý-jattyǵý polıgondarynda kúndiz de, túnde de qurlyqtaǵy jáne áýedegi nysandarǵa qarýdyń barlyq túrinen atys júrgizýdi kózdeıtin jaǵdaı jasaldy.
Jalpy, bul oqý-jattyǵýǵa 15000-nan asa áskerı qyzmetshi qatysyp, 3000-nyń ústinde qarý-jaraq pen áskerı tehnıka jumyldyryldy.