Jańa jasandy qondyrǵylarda pandýstar jáne arnaıy platformalar bar
Almaty oblysynda ornalasqan «Almaty-Bishkek» jáne «Almaty-SHelek-Qorǵas» kúre joldarynda bes jańa jerústi jaıaý júrginshiler ótkeli salynyp, qoldanysqa berildi, dep habarlaıdy Almaty-akshamy.kz.
«QazAvtoJol» ulttyq kompanıanyń baspasóz qyzmetiniń málimetinshe, jerústi jaıaý júrginshiler ótkelderi «Almaty-Bishkek» tasjolynyń 23, 24, 28, 45 shaqyrymdary jáne «Almaty-SHelek-Qorǵas» kúre jolynyń 33 shaqyrymynda paıda boldy.
Jańa jer ústi jaıaý júrginshiler ótkelderiniń janynda Qumtoǵan, Almabalyq, Qasymbek, Báıterek eldi mekenderi jáne Kerýen avtostansıasy ornalasqan. Qurylys barysynda erekshe qajettiligi bar jandarǵa qolaıly jaǵdaı jasaýǵa basa kóńil bólingen.
«Jańa jasandy qondyrǵylarda pandýstar jáne arnaıy platformalar bar. Al jaıaý júrginshilerdiń yńǵaıy úshin baspaldaqtardyń ústinde arnaıy shatyrlar qarastyryldy. Sonymen qatar túngi ýaqytta paıdalanýshylardyń qaýipsizdigin qamtamasyz etý úshin zamanaýı jaryqdıodty shamdar ornatyldy. Jańa tıptegi jerústi jaıaý júrginshiler ótkelderiniń qyzmet etý merzimi keminde 15 jyl», - dep habarlady ulttyq kompanıada.