Almaty qalasy Sanıtarlyq-epıdemıologıalyq baqylaý departamenti basshysynyń mindetin atqarýshy, qalanyń bas memlekettik sanıtar dárigeri Qarlyǵash Ábdijabbarova Almaty qalasynda epıdemıologıalyq jaǵdaı kúrt nasharlaǵanyn málimdedi, dep habarlaıdy Almaty-akshamy.kz
Óńirlik komýnıkasıa qyzmeti alańynda ótken brıfıńte Q. Ábdijabbarova QR boıynsha epıdemıologıalyq jaǵdaıdy baǵalaý matrısasynda Almaty úshinshi kún «qyzyl» aımaqta ornalasqanyn jetkizdi. Aptalyq syrqattanýshylyq 100 myń turǵynǵa shaqqanda 2,2 ese ósken, ıaǵnı 47,6-dan 105,6-ǵa deıin, ınfeksıanyń berilý ındeksi aıasynda 1,4-ten 2,5-ke deıin ulǵaıǵan.
Epıdemıanyń taǵy bir tolqyny jańajyldyq merekeler men osy jyldyń qańtar aıynyń basynda belgili oqıǵalardan keıin bastaldy jáne «omıkron» shtamyna baılanysty bolyp otyr. Bul zerthanalyq túrde osy jyldyń 6 qańtardaǵy tolyq genomdyq sekvenırleý nátıjelerimen rastaldy. QR DSM-de 96 synamadan 8 synamada omıkron shtamy anyqtaldy, onyń ishinde 7 synama Almaty qalasynan boldy. «Delta» shtamdary synamalardyń 71%-ynda anyqtaldy, «delta plús» 16%-da, basqa shtammdar 4,7%-da tabyldy, - dedi ol.
«Omıkron» shtamyna tán Almaty qalasyndaǵy epıdemıologıalyq prosestiń erekshelikteri - asa joǵary juqpalylyǵy, ımýnıtetke tótep berý qabileti, qaıta juqtyrý qaýpiniń joǵarylaýy jáne 20-30 jas aralyǵyndaǵy azamattardyń zaqymdanýy baıqalady.
Osylaısha, apta saıynǵy syrqattanýshylyq ta, buryn KVI-men aýyryp saýyqqan adamdardyń qaıta juqtyrý jaǵdaılary da aldyńǵy 7 kúndegi 10 jaǵdaıdan sońǵy 7 kúndegi 66 jaǵdaıǵa deıin kúrt ósken. Sımptomsyz nysandardyń jeltoqsan aıyndaǵy 6%-dan 11%-ǵa deıin ulǵaıýy aýyrǵandardy ýaqtyly anyqtaýdy jáne oqshaýlaýdy qıyndata túsken.
KVI juqtyrǵandardyń úles salmaǵy 20 jastan 40 jasqa deıingi adamdar arasynda 16,4%-ǵa jáne jasóspirimder arasynda 1,1%-ǵa kúrt ósti, bul da «omıkron» shtamyna tán. Munyń bári «omıkron» shtamynyń halyq arasynda tez taralatynyn jáne kóp uzamaı «delta» shtamyn almastyratyndyǵyn kórsetedi. Biz kelesi KVI tolqynynyń shyńyn osy jyldyń naýryz aıyna boljap otyrmyz, - dedi Qarlyǵash Ábdijabbarova.