Qarjy pıramıdalary klıentpen jeke jumys istegendi jón sanaıdy.
İshki ister mınıstrligi qarjy pıramıdalarynyń jumys isteý ádis-tásiline qatysty túsinik berdi, dep habarlaıdy Almaty-akshamy.kz
Elimizde qarjy pıramıdalarynyń qurbany bolyp, jeke múlki men qarajatynan aırylyp jatqan azamattar kóp.
«Eger sizge klıentter tartsańyz qosymsha aqy (bonýs) tólenedi dese, demek, ol kúdik týǵyzýy tıis. Árıne, siz oǵan óz jaqyndaryńyz ben tanystaryńyzdy tartasyz. Solaısha olardyń da basyn qaýipke tigesiz. Ekinshiden, olar mol tabysqa tez ári jeńil qol jetkizýge ýáde beredi. Kelesi jaıt - qyzmet etýge ruqsat beretin lısenzıa. Mekemeniń zańdy lısenzıasy bolmasa, demek, ol - qarjy pıramıdasy. Sol sıaqty alǵashqy jarna tóleý ádisi de solarǵa tıesili. Iaǵnı, túrli aksıany oılap tabady nemese sizdiń biliktiligińizdi kóteremiz, oqýǵa jiberemiz dep ýáde etedi», - dedi QR İİM tergeý departamentiniń basshysy Sanjar Ádilov brıfıńte.
Departament basshysynyń aıtýynsha, qarjy pıramıdasy qyzmetine tán taǵy bir fakti kompanıanyń búdjeti bolmaıdy, olarǵa aqshany klıentter alyp keledi.
«Keıbir qarjy pıramıdasy shaǵyn nemese ortasha qarjy mekemesi retinde jumys istep, klıentterdi ınvestısıa quıýǵa shaqyrady. Sondaı-aq, qymbat aktıvter týraly da sóz qozǵaýy múmkin. Al is júzinde olardyń ózinde eshqandaı qarajat ta, aktıv te joq. Odan keıin, jarnama. Qazir jarnama jasaýdyń túrli ádisi bar. Ásirese áleýmettik jeliniń kómegimen. Sondyqtan jelidegi jyltyraǵannyń bárine sene bermegen jón. Odan bólek, sizben kelisimshart jasaıdy, sol kezde qujatty muqıat oqyp shyǵyńyz. Kóp jaǵdaıǵa azamattar mán bermeı qol qoıa salady», - deıdi ol.
Sondaı-aq, spıker qarjy pıramıdalary klıentpen jeke jumys istegendi jón sanaıtynyn aıtty. Onyń sebebi - jalǵyz adamdy áńgimelesý arqyly kóndirý ońaıyraq. Basqasha aıtqanda, psıhologıalyq ádis. Buǵan deıin habarlaǵanymyzdaı, Qazaqstanda 30 myńnan astam adam qarjy pıramıdalaryna aldanǵan.