Qarasaı batyr kóshesindegi jaıaý júrginshiler aleıasyn abattandyrý jumysy aıaqtalyp qaldy. Bul aleıa Naýryzbaı batyr kóshesinen Abylaı han dańǵylyna deıingi aralyqty qamtyǵan.
"Qala ortalyǵynyń mańyzdy bólshegine aınalǵan kóshe endi jańa sıpatqa ıe bolyp, zamanǵa laıyq, jaıly jáne kógaldandyrylǵan keńistikke aınaldy. Joba "Halyq qatysatyn búdjet" baǵdarlamasy aıasynda qolǵa alynyp, ol jaqyn mańdaǵy jańartylǵan Qaraǵaıly skverimen jalǵasqan. Bul eki keńistik birigip, qalanyń jasyl ınfraqurylymynyń ózara baılanystyratyn birtutas jaıaý júrginshiler men demalys aımaǵy bolady", - dep málimdedi Almaly aýdanynyń ákimi Arman Shamshın baspasóz týry barysynda.
Qarasaı batyr kóshesiniń boıyndaǵy aleıa – bul jaı ǵana jaıaý júrginshiler dálizi emes, ol almatylyqtardyń kúndelikti ómiriniń mańyzdy bóligi. Munda dámhanalar jumys isteıdi, halyq serýendep, keshki ýaqytta turǵyndar aǵashtyń saıasynda demalady. Bul aýmaqta sońǵy ret jóndeý jumysy 2017 jyly júrgizilgen, sodan beri keńistik óziniń kórkemdik kelbeti men birqatar qyzmetin joǵaltqan edi. Turǵyndardyń ótinishi men qalalyq bıliktiń qoldaýynyń arqasynda munda 2025 jyldyń sáýirinde kúrdeli jóndeý jumysy bastaldy. Qazir jumystyń 70% aıaqtalǵan. Qalǵan jumystar shildeniń alǵashqy onkúndiginde aıaqtalyp qalady dep josparlanyp otyr.
Abattandyrýdyń jalpy aýmaǵy – 8 500 m². Onyń 8 200 m² jýyǵy kógaldandyryldy. Barlyq jamylǵylary jańartyldy: 3 120 m² asfálttalyp, 1 865 m² alańǵa qalyńdyǵy 6 sm bolatyn brýschatka tóseldi. Sonymen qatar, 206 metr bordúr men 1 947 metr porebrık ornatyldy. Kishi arhıtektýralyq formalar men jaryqtandyrý máselesine de erekshe kóńil bólindi: 18 jańa oryndyq pen jańa úlgidegi 28 sham ornatyldy.
3 200 m² eski jabyn alynyp tastalyp, 10 aǵash kesildi. Bul kósheniń tabıǵı kelbetin saqtap qana qoımaı, onyń ekologıasyn jaqsartýǵa da sep bolmaq.
"Abattandyrý tujyrymdamasy ornyqty qalalyq damý jáne jaıaý júrginshilerge basymdyq berý qaǵıdattaryna negizdelgen. Qarasaı batyr kóshesi qatynaıtyn baǵyt qana emes, serýendeýge, kezdesý men demalýǵa arnalǵan jaıly, qaýipsiz qalalyq keńistikke aınalady. Almaty ózgerip, abattanyp, jaıly qalaǵa aınalyp jatyr", – dep tolyqtyrdy aýdan ákimi.