Jaýapty mekemeler el suraýyna jaýap bere almaı otyr
Qarasaı aýdanynda kóptiń qoldanysyndaǵy jol jekeniń qaramaǵyna ótip ketken. Al jaýapty mekemeler el suraýyna jaýap bere almaı otyr. Mektepke aparar baǵyttyń qalaı baqylaýdan shyǵyp ketkenin jergilikti ákimdik te bilmeıdi, dep habarlaıdy Almaty-akshamy.kz Almaty.tv-ge silteme jasap.
Eldi alań qylǵan aýmaq - osy. O bastaǵy jospar boıynsha ári kóptiń qolyndaǵy qujatqa sáıkes munda jol túsýi kerek. Biraq 5 aı buryn úıdiń ıesi ózine tıesili aýmaqty qorshaǵan. Máseleniń tórkini - jol ústin jekemenshikke berip jibergenderde jatyr.
«Burynǵy ákim bylaı satyp kelgen, qazirgi ákim bylaı satqan. Eki ortada joldy jaýyp tastaǵan, boldy. Sonsha halyq myna jerdi, qanshama semá, eshkim bylaı bara almaı tur», – dedi Jibek joly aýylynyń turǵyny Salamat Bekjan.
Eldiń aldy 2012-de kóship kelgen. Al 2017 jyly kórsetilgen aýmaqtyń jol tıpinde qoldanysqa berilýi jóninde qujat rásimdelipti. Osy tusta túsinbestik týady: úı salyp, joldy qorshap alǵan azamattyń da zańdy qaǵazy bar.
Túıini tarqamaı turǵan túıtkilge qatysty eshkim naqty jaýap bergen joq. Jerdiń qoldanys tıpin kimniń, qashan ózgertkenin surap ek, aýdan men aýyl ákimshiligi bir-birin nusqaýdan ári aspady.
«Aýdanǵa baǵynyshty bólimderdiń tarapynan berilgen shyǵar ol, men naqty bilmeımin. Biraq bizdiń Jibek joly ákimi apparatynyń tarapynan eshqandaı jer berilgen joq», - dedi Jibek joly aýyldyq okrýgi ákiminiń orynbasary Dıdar Nuraqynov.
«Genplan boıynsha jol qarastyrylǵan ol aýmaqta. Sol sebepti Jibek joly aýyldyq okrýgi ákiminiń orynbasary aryz jazǵan, sotqa aryzdanýyńyzdy suraımyz dep», –dedi Qarasaı aýdandyq ákimi apparaty qurylys jáne sáýlet bóliminiń mamany Jánibek Qaıyrjanuly.
Eki ákimdiktiń mamany da másele tek sotta sheshiledi dep otyr. Ol úshin turǵyndar aryzdanýy kerek. Endigide jalpy qoldanystaǵy jerdiń qashan, qandaı jolmen jekemenshikke ótip ketkenin tek quzyrly organdar anyqtaı alady.