Muny jergilikti ákimdik ókilderi de joqqa shyǵarmady
Almaty oblysyndaǵy eldi meken men saıajaıda turatyn 2 myńnan astam bala 500 oqýshyǵa ǵana arnalǵan mekteptegi orynǵa talasyp oqyp jatyr, dep habarlaıdy Almaty-akshamy.kz Almaty.tv-ge silteme jasap.
Qarasaı aýdanyna qarasty Kókózek aýylyndaǵy bilim ordasy 3 aýysymmen oqysa da, másele retteler emes. Muny jergilikti ákimdik ókilderi de joqqa shyǵarmady. Alaıda oqýshylardyń daýryqqan ata-anasy «bıliktegilerdiń shyndyqty moıyndaǵany emes, naqty iske kiriskeni kerek» deıdi.
Qarasaı aýdanyndaǵy 12 mektepte bıyl da oryn tapshy, sondyqtan 3 aýysymda bilim berýge májbúr. Saldarynan sabaqtyń bastalar ýaqyty da, aıaqtalar sáti de ózgergen. Máselen, Kóktoǵan men Aqseńgir aýylyndaǵy jurt "bir balany mektepke tańda aparsaq, ekinshisin túske taman, al úshinshisin keshke qaraı kezek-kezek attandyryp otyramyz" deıdi.
«11 nemerem bar. İshinde 0, 1, 2 synyptarda oqıtyndary bar. Tańerteń oqıdy olar. Tústen keıin oqıtyn 9 synyptaǵy qyzdarymyz tústen keıin shyǵady, keshki 7-8-derde keledi», – dedi Kóktoǵan aýylynyń turǵyny Mehrıza Tóltenova.
Shalǵaı aýyldaǵy oqýshylardyń deni bilim ordasyna mektep avtobýsymen qatynaıdy. Ata-analardyń sózinshe, munda da oryn tapshy. "Aýyl balalaryn alyp ketýge kelgen kólik birinshi aýyldan shyqpaı jatyp, bir sátte lyq tolatyn kórinedi. Sonyń saldarynan oqýshylar bir-birin ıterip, mektepke jetkenshe syǵylysyp barady" - deıdi.
«30 bala sıatyn avtobýsqa 60-70 balany otyrǵyzamyz. Avtobýs óte kishkentaı», – dedi Kóktoǵan aýylynyń turǵyny Saltanat Baıǵabyl.
Kóktoǵandaǵy aıaldamaǵa sol mańdaǵy saıajaıda turatyn oqýshylar da keledi. Alaıda bul jerge jetý úshin olar eń aldymen shańy betine shyǵyp, jańbyrly kúnderde mı batpaq bolatyn qotyr jolmen júredi.
Balalary mektepten kesh qaıtqandyqtan, ata-ana qoldaryna sham alyp, jolyn tosatyn kórinedi. Sebebi aýylda jaryq joq, onyń ústine qańǵyǵan ıt te kóp deıdi. Alaıda Kókózektegi mektep dırektory oqýshylar qaýipsizdigi úshin arnaıy kezekshiliktiń baryn aıtyp aqtaldy.
«Negizinde mektebi joq eldi mekenderden tasymaldaý uıymdastyrylǵan. Arnaıy kezekshiler qoıylǵan. Olar shyǵaryp salady jáne qarsy alady», – dedi Kókózek aýylyndaǵy orta mektep dırektory Jámılá Mankeeva.
Mektep dırektorynyń sózinshe, búginde 2 myńnan astam bala oqıtyn Kókózektegi orta mektep 2000 jyldary salynǵan. Al oryn tapshylyǵy osydan 2 jyl buryn biline bastapty. Qarasaı aýdandyq bilim bólimi bul másele boıynsha jumys qazir qyzý júrip jatyr deıdi. Sózine sensek, aldaǵy 1-2 jylda dál sol Kókózek aýylynda 1200 oryndyq bilim ordasy boı kótermek.
«Úsh aýysymdy 12 mekteptiń 3-eýine 600 oryndyq japsarjaı qurylysy júrgizilip jatyr. Jańa úsh mekteptiń qurylysy júrgizilip jatyr. Qalǵan úsh mektepke jańa mektep qurylysyn júrgizý úshin jer telimderi tolyq qarastyryldy. Aktisi bar. Qazirgi ýaqytta jobalyq qujattamalary daıyndalýda», – dedi Qarasaı aýdandyq bilim bólimi basshysynyń mindetin atqarýshy Ásel Erkimbaeva.
Ákimdik ókili úsh aýysymdy mektepterdiń júktemesin azaıtý maqsatynda jumystar júrip jatqanyn aıtady. Alaıda oǵan qatynaıtyn avtobýstyń baǵytyn uzartý nemese sanyn arttyrý máselesi qalaı sheshiletinin naqty aıtpady. Aıta ketsek, Qarasaı aýdanynda 78 myńnan astam oqýshy 52 mektepte bilim alyp jatyr.