Túsirý jumystary qarasha aıynda aıaqtalady
Qazaqstandyq rejıser-anımator Qýanysh Naǵyz «Taıqazan hıkaıasy» atty múltfılm túsirip jatyr. Onda kıeli Taıqazandy qaıtaryp alý úshin jolǵa attanyp, zulym jaýmen shaıqasta qaısarlyq kórsetken jas batyr týraly baıandalady, dep habarlaıdy Almaty-akshamy.kz.
«2007 jyly men «Altyn jebe» anımasıalyq fılmder festıvaline qatystym, ol kezde T. Júrgenov atyndaǵy QazUÓA úshinshi kýrs stýdenti edim. Festıvál sheńberinde barlyq qonaqtarǵa Túrkistandy aralatyp, Qoja Ahmet Iassaýıdiń kesenesine alyp bardy. Sol kezde kıeli Taıqazandy alǵash kórip, keremet áser aldym. Osydan shamamen eki jyl buryn Taıqazan týraly múltfılm túsirýdi oılap, barlyq derektermen tanysyp shyqtym. Keıin senarı jazyp, osy jazda Ulttyq kınony qoldaý memlekettik ortalyǵynyń senarıler baıqaýyna qatystym», - deıdi rejıser Qýanysh Naǵyz.
Aıta ketsek, bul jas rejıserdiń alǵashqy jumysy emes. Ol ár jyldary «Qazaqfılm» kınostýdıasynda «Úsh syılyq» jáne «Meniń atym Qozy» syndy basqa da anımasıalyq týyndylardy túsirgen.
Rejıserdiń aıtýyna qaraǵanda, «Taıkazan hıkaıasy» - komedıamen aralas túsiriletin shytyrman oqıǵaly múltfılm. Sonymen qatar, ol daıyndyq kezeńi barysynda aýqymdy jumystar atqarylǵanyn, fılmniń negizgi personajdary salynǵanyn, sondaı-aq jobanyń anımatıgi (syzba nusqasy) túsirilgenin habarlady. Búginde jas mýltıplıkator negizgi lokasıalardy salyp, keıbir sahnalardy qozǵalyspen kórkemdep jatyr. Túsirý jumystary qarasha aıynda aıaqtalady.