Qaraǵandyda balalardyń jappaı ýlanýynyń sebebin anyqtaý úshin analız alynyp, aldyn ala nátıjesi belgili boldy, dep habarlaıdy Almaty-akshamy.kz QazAqparatqa silteme jasap.
«Dárigerler balalardyń jaǵdaıyn tekserý barysynda taǵy 2 bala ishi aýyrǵanyn aıtty. Olar aýrýhanaǵa jetkizildi, mamandardyń baqylaýynda. Balalar ýlanýynyń aýyrlyǵy ıntoksıkasıa jáne tynys alýdyń jetkiliksizdigimen baılanysty. Osy oraıda zardap shekken keıbir balalardyń jaǵdaıy óte aýyr bolyp tur. Dárigerler aýrý saldarymen kúresip jatyr», - dedi Densaýlyq saqtaý mınıstri Ajar Ǵınıat Qaraǵandy óńirlik komýnıkasıalar qyzmeti alańynda ótken baspasóz máslıhatynda.
Mınıstrdiń málimdeýinshe, qazir búkil qajet taldaýlar alynyp jatyr.
«Aldyn ala boljam boıynsha, taǵam toksıkoınfeksıasy dıagnozy kúmán týdyrady. Osyǵan deıingi baqylaý barysy kórsetkendeı ishek ınfeksıasyna uqsamaıdy. Ol boıynsha aldyn ala analız nátıjesi teris. Qazir analızder naqtylanyp jatyr», - deıdi vedomstvo basshysy.