Qaraǵandy qalasynyń «Keńdala» shaǵyn aýdanynda 1 qyrkúıekte 2000 orynǵa eseptelgen alǵashqy jaıly mektep ashyldy, dep habarlaıdy aqshamnews.kz.
Bul jańa mektep qalanyń ońtústik-shyǵys bóligindegi tórt mekteptegi júktemeni tómendetýge múmkindik beredi. Birinshi kezekte munda Álıhan Ermekov atyndaǵy mektep-lıseıiniń oqýshylary kóship keldi. Ashylý saltanatyna Qaraǵandy oblysynyń ákimi Ermaǵanbet Bólekpaev pen Eńbek jáne halyqty áleýmettik qorǵaý mınıstri Svetlana Jaqypova qatysty.
– Birinshi qyrkúıek – sizderdi jańa bilim álemine jeteleıtin kezeńniń bastamasy. Bilim men ǵylym – tabysqa jetýdiń basty kilti. Jas urpaqqa jaıly, sapaly bilim berý úshin qolaıly jaǵdaılar jasaý – bizdiń basty maqsatymyz. Osy jaıly mekteptiń qabyrǵasynda sizderdi qyzyqty ári ádemi bolashaq kútip turǵanyna senimdimin! – dedi aımaq basshysy.
– Men sizdermen osyndaı erekshe kúni birge bolǵanyma óte qýanyshtymyn. Memleket basshysynyń tikeleı tapsyrmasy boıynsha júzege asyrylyp jatqan «Jaıly mektep» jobasy apatty mektepterdi joıýǵa, oqýshy oryndarynyń tapshylyǵyn eńserýge jáne jaıly bilim berý prosesin qamtamasyz etýge baǵyttalǵan, – dep atap ótti mınıstr. – Sizderdiń mektepterińiz jaı ǵana jańa ǵımarat emes. Bul damý men oqý úshin tamasha jaǵdaılar jasalǵan oryn.
Jaıly mektepke konkýrs arqyly 150 muǵalim jumysqa qabyldandy. Alǵashqy kúnderden bastap oqýshylar men pedagogtar «Jaıly mektepter» ulttyq jobasynyń standarttary boıynsha jańa formattyń artyqshylyqtaryn baǵalaı bastady. Bastaýysh jáne joǵary synyp oqýshylary úshin oqý kabınetteri, sanıtarlyq toraptar men sport zaldary bar jeke bloktar qarastyrylǵan. Yńǵaıly jáne qaýipsiz bolý úshin alty kireberis pen shyǵatyn esikter jasaldy.
Kabınetter men zerthanalar modıfıkasıalanǵan jáne eń zamanaýı talaptarǵa saı jabdyqtalǵan.
«Bizge oqý yńǵaıly ári qyzyqty bolýy úshin barlyq jaǵdaı jasalǵan. Maǵan ár qabatta kovorkıng aımaǵynyń bary unaıdy. Mektepte tórt sport zaly bar, bul sportqa kóp kóńil bólinetinin bildiredi», – dep bólisti onynshy synyp oqýshysy Dına Jumabaı.
