Jasandy ıntellekt jáne sıfrlyq damý vıse-mınıstri Dmıtrıı Mýn osyǵan qatysty pikir bildirdi, - dep habarlaıdy aqshamnews.kz
Buǵan deıin jelide Qazaqstandaǵy tanymal adamdardyń balalaryna qatysty jeke derekter kórsetilgen skrınshottar paıda bolǵan edi.
Vıse-mınıstrdiń aıtýynsha, júrgizilgen tekseris júıe buzylmaǵanyn kórsetken.
"Kodty fızıkalyq nemese logıkalyq túrde buzý deregi bolmaǵan. Sebebi - adamı faktordan", - dedi Dmıtrıı Mýn.
Onyń sózinshe, jarıalanǵan málimetter 2020 jylǵa deıin ózekti bolǵan. Olar buryn júıege zańdy túrde kire alǵan paıdalanýshylardyń eseptik jazbalary arqyly alynǵan.
Soǵan qaramastan, Kundelik-ti ázirleýshi kompanıa jaýapkershilikke tartylǵan. Dmıtrıı Mýnnyń aıtýynsha, Aqparattyq qaýipsizdik komıteti jeke derekterdi qorǵaý salasyndaǵy zańbuzýshylyqtar úshin kompanıaǵa aıyppul salǵan.
"Derekterdiń taralýy men kıberqaýipsizdik máseleleri boıynsha aıyppuldardy jyl saıyn arttyryp kelemiz. Qazir jappaı derek taratý jaǵdaılary úshin jaýapkershilikti birneshe ese kúsheıtý máselesi de qarastyrylyp jatyr", - dedi vıse-mınıstr.