Qaraǵandy oblysynyń polıseıleri men taksı júrgizýshisi zeınetkerdi alaıaqtardyń arbaýynan qutqardy, – dep habarlaıdy Polisia.kz.
Alaıaqtyq qylmysynyń aldyn alý maqsatynda úzdiksiz júrgiziletin profılaktıkalyq is-sharalarǵa qaramastan, alaıaqtardyń aıla-tásilderine aldanyp, qomaqty qarjylarynan aıyrylyp qalatyn azamattar az emes.
Al tártip saqshylary kún saıyn alaıaqtyq faktileriniń jolyn kesý maqsatynda jumys atqarady. Ótken senbi kúni Qaraǵandy oblysy Abaı aýdanynyń 71 jastaǵy turǵyny telefonyna túsken belgisiz qońyraýǵa jaýap beremin dep alaıaqtyń arbaýyna túsken. “Banktiń qaýipsizdik qyzmetiniń mamanymyn” dep qońyraý soqqan belgisiz bireý azamatshadan 3 mıllıon teńge nesıesin jabýyn talap etken. Ondaı aqshasynyń joq ekenin aıtqan azamatsha olardyń bergen nusqaýymen oblys ortalyǵyna kelip, nesıe rásimdep, alaıaqtarǵa jibermek bolǵan eken.
Turǵynǵa telefon soqqandar oblys ortalyǵyna kelý úshin taksı jaldap bergen. Jolaı azamatshanyń kúdik týdyrǵan bógde bireýmen telefon arqyly áńgimesin estigen taksı júrgizýshisi jergilikti jerdiń polısıa qyzmetkerlerine habar bergen.
Keıin taksı júrgizýshisi polısıa qyzmetkerleriniń bergen nusqaýymen jol shetine toqtaǵan. Sol kezde alaıaqtar taksı oǵan habarlasyp, ne sebepti toqtaǵanyn suraǵan. Júrgizýshi birden olarǵa birneshe syltaý aıtyp, tártip saqshylary kelgenshe ýaqyt soza turǵan. Sodan Abaı aýdandyq polısıa qyzmetkerleri sol kólikke otyryp, zeınetkerge kimge aqsha aýdaraıyn dep jatqanyn túsindirgen.
Taksı júrgizýshisi zeınetker men polısıa qyzmetkerlerin alǵashynda bankke, keıin alaıaqtar bergen nusqaý boıynsha “aqsha aýdarý” úshin saýda úıindegi termınalǵa aparǵan, biraq eshqandaı aqsha aýdarmaǵan.
Keıin saýda úıine barǵanda zeınetker alaıaqtarǵa sol jerdegi termınaldyń jumys istemeı qalǵanyn jáne óziniń densaýlyǵy nasharlap ketkenin aıtqan. Sol kezde alaıaqtar zeınetkerge daýys kóterip, qorqyta bastaǵan. Alaıda olar zeınetkerdiń janynda polısıa qyzmetkerleri bolǵanyn sezbegen.