Bostandyq aýdanynyń ardagerleri «Taza qala. Taza saıabaq» atty ıgi bastama kóterip, kópke úlgi isti qolǵa aldy.
Osynaý shara aıasynda aýdannyń belsendi qarıalary qalanyń birshama jerin qardan tazartyp shyqty. Qoldaryna kúrek-qaıla ustaǵan qarıalardyń qımyly tym shıraq. Daýystary da jarqyn-jarqyn. «Kúni boıy úıde otyrǵansha qalamyzdyń tazalyǵyna óz úlesimizdi qosyp, jastarǵa úlgi kórseteıik dedik. Biz úshin Almaty – barshamyzdyń súıikti qalamyz bolǵandyqtan, onyń kelbetiniń kórikti bolǵany kerek» deıdi belsendi qarıalar.
«Qar tazalaýshy» qarıalarǵa saıabaqta serýendep júrgen qala turǵyndary, jastar jaǵy da qyzyǵýshylyq tanytyp jatyr. Endi bir sátte jastar da qoldaryna kúrek alyp, aınalany qardan tazalap, ardagerlerge kómek kórsetýge jumyldy.
Jangeldi SÁDENULY, Bostandyq aýdandyq Ardagerler keńesiniń tóraǵasy:
ALMATYNYŃ TAZALYǴYNA ÚLESİMİZDİ QOSSAQ DEIMİZ
Memleket basshysynyń «Taza Qazaqstan» bastamasyna ún qosyp, «Taza Qala. Taza saıabaq» degen aksıa ótkizip otyrmyz. Mundaǵy bizdiń basty maqsatymyz – jastarǵa ónege kórsetip, úlgi bolsaq deımiz. Saıabaq taza bolsa, qalamyz, tóńiregimiz taza bolady emes pe? Sondyqtan aýdannyń qarıalary aqyldasa kele, tek kóktem, kúzde ǵana emes, qysta da osylaı aksıa ótkizip otyrýdy sheshtik. Aýdanymyzdyń «Orbıta-1, 2, 3, 4» jáne «Taýgúl» yqshamaýdanynda, «Botanıkalyq baǵynda» qarıalar qar kúrep, belsendilik tanytyp jatyr. Bizdi eshkim májbúrlep jatqan joq. Ózimiz osyndaı qadamǵa baryp, qalanyń tazalyǵyna úlesimizdi qossaq deımiz. Óıtkeni, bul saıabaq barlyǵymyzdyń demalatyn, serýendeıtin demalys ornymyz.
Rahym ÁBİLHANULY,
Jastardy rýhanı jáne patrıottyq sezimge tárbıeleý jónindegi komısıa tóraǵasy:
JASTARYMYZ ELİ MEN JERİN, TİLİN QURMETTESİN
Qazir meniń jasym 79-da. «Kezinde eńbek ettik qoı, elge eńbegim sińdi» dep qarap otyrǵym kelmeıdi. Qazir qoǵamdyq jumystarǵa aralasyp, jastarǵa úlgi kórsetip júrmin. Jastarymyz eli men jerin, tilin qurmettesin. Qazir ózi bir kóshtiń sońynan ekinshi kósh keledi degen zaman boldy ǵoı. Biz sol eki qoǵamdy da kórgen adamdarmyz. Jastarǵa durys tárbıe berýde jalań sózben emes, ispen úlgi bolaıyq.
Aıjamal KÓBDEN,
Bostandyq aýdanynyń turǵyny:
SERGEKTİK ÚSHİN DE QIMYL KEREK
Saıabaqqa jaqyn mańda turamyn. Osynda jıi serýendeımin. «Taza Qazaqstan» aıasynda qar kúrep, qalanyń tazalyǵyna az da bolsa úlesimdi qosyp jatqanyma sondaı qýanyp turmyn. Nege deseńiz, men kópqabatty úıde turǵandyqtan, qımyl-qozǵalys az. Sondyqtan sergektik úshin de qımyl kerek der edim.