Qysta kóshe tazalaýdyń tehnologıalyq kezeńderi jaıly mamandar aıtyp berdi, dep habarlaıdy Almaty-akshamy.kz
Almaty qalasy Komýnaldyq ınfraqurylymdy damytý basqarmasynyń dereginshe, qys kezinde kósheler «Almaty qalasynyń aýmaǵyn abattandyrý qaǵıdasynda» (Almaty qalasy máslıhatynyń VI sesıasynyń 2007.12.12 №45 sheshimi) bekitilgen tehnologıaǵa sáıkes tazartylady.
Birinshi kezeńde qar jaýǵanǵa deıin («Qazgıdromet» RMK boljamynsha) qum taratqyshtar bekitilgen oryndarǵa shyǵarylady.
Qar jaýa bastaǵannan keıin 20-40 mınýt ótken soń jolǵa kóktaıǵaqqa qarsy materıaldar (KQM) sebiledi, óıtkeni KQM sińýi úshin jetkilikti qar qalyńdyǵy qajet. KQM 3 saǵat ishinde sebiledi.
Asfáltqa jabyspaıtyn jańa jaýǵan kóbik qardy kólikter baǵany tyrmalap, sypyrady.
Bir marshrýttyń uzyndyǵy 45-90 km, bir baǵan marshrýtty 2-5 saǵat ishinde júrip ótedi. Qarbalas ýaqytta baǵannyń marshrýtty júrip ótý ýaqyty 1,5 esege uzarady.
Kóktaıǵaqqa qarsy materıaldar árbir 5 sm qar jaýǵan saıyn sebiledi, sodan keıin qar qaıtadan kúreledi. Bul tehnologıa saqtalmasa, joldarda muz paıda bolady.
Kóshelerdi qardan tazartýdyń sońǵy kezeńinde qardy úıip, shyǵarý, jol shetindegi jıektastardyń qary kúrelip, muzdar úgitilip, qar men muz kesekteri jınalady.
Qardy kúreý men shyǵarý eń áýeli úlken magıstraldyq kóshelerde jáne jaıaý júrginshiler men kóp kólik júretin qalalyq mańyzy bar kóshelerden bastalady. Bul kólik legine, sáıkesinshe joldardyń enine, olardyń ınfraqurylymdyq mańyzdylyǵyna baılanysty.
Sosyn qoǵamdyq kólik aıaldamalary, jaıaý júrginshiler ótkelderi, jaıaý júrginshiler shoǵyrlanǵan jerler (iri ámbebap dúken, bazar, teatr, mektep, emhana jáne t.b.), metropolıten beketteri, aýrýhanalardyń qabyldaý bólimine kireberisi, jedel járdem stansıalary men basqa da áleýmettik nysandardan qar shyǵarylady.
Kireberister, baspaldaqtar, jaıaý júrginshiler joldarynan, kóshe joldary men trotýarlardaǵy qar basymdyǵyna qaraı jınalady. Budan keıin konteınerlik alańdarǵa kireberister, ótkelder men avtoturaqtar, balalar jáne sport alańdary tur.
Arnaıy tehnıka men jumysshylardyń joǵaryda atalǵan nysandarda jumysty aıaqtaýyna qaraı aýdandyq mańyzy bar kósheler men aýla mańynda, sonymen qatar, qalanyń ákimshilik ǵımarattarynyń kireberisindegi qar shyǵarylady.
Jaýǵan qardyń kólemine baılanysty 3-5 táýlik ishinde qalanyń negizgi kóshelerinen qar shyǵarylady.