Qazirgi pandemıa ýaqytynda kóp jandar qozǵalys tapshylyǵyn sezinip jatyr.
Konstıtýsıa kúni qarsańynda Qapshaǵaıda múmkindigi shekteýli jandar arasynda spartakıada ótti, dep habarlaıdy Almaty-akshamy.kz Baq.kz-ke silteme jasap.
Jarysqa qatysýshylar fýtbol, voleıbol, basketbol jáne shahmat pen doıby oıyndary boıynsha saıysqa tústi.
«Bizben birge» qoǵamdyq qorynyń qoldaýymen ótken sporttyq oıyndarǵa 35 ten asa adam qatysty. Osylaısha «Qapshaǵaı arnaýly áleýmettik qyzmet kórsetý ortalyǵy» KMM-de tartysqa toly doda boldy.
«Bizdiń ortalyqta 130-dan astam adam qaralady. Densaýlyqtaryndaǵy erekshelikterine qaramastan, olar fýtbol, voleıbol, basketbol oınap, sportpen belsendi túrde aınalysady. Qazirgi pandemıa ýaqytynda kóp jandar qozǵalys tapshylyǵyn sezinip jatyr. Sondyqtan, osyndaı jarystardy ótkizý mańyzdy», - deıdi Qapshaǵaı arnaýly áleýmettik qyzmet kórsetý ortalyǵynyń mamany Almaz Ahatqyzy.
Spartakıada sońynda jeńimpazdar baǵaly syılyqtarmen jáne arnaýly alǵys hattarmen marapattaldy.
Qapshaǵaı qalasy ishki saıasat bólimi men «Bizben birge» qoǵamdyq qory qoldaý kórsetken jarys nátıjeli aıaqtaldy.