Táýelsizdik alǵan keıin qabyldanǵan Ata Zańymyz qoǵamnyń órkendeýine qarqyn qosty.
İshki ister mınıstri Erlan Turǵymbaev qazaqstandyqtardy Konstıtýsıa kúnimen quttyqtady, dep habarlaıdy Almaty-akshamy.kz.
«Qurmetti otandastar! Qymbatty ardagerler jáne áriptester! Sizderdi shyn júrekten Konstıtýsıa kúnimen quttyqtaımyn. Táýelsizdik alǵan keıin qabyldanǵan Ata Zańymyz qoǵamnyń órkendeýine qarqyn qosyp, Qazaqstan halqynyń birligine jol bastaǵanyn búgingi ýaqyt dáleldep otyr», - dep jazdy mınıstr Facebook-te.
Turǵymbaev atap ótkendeı, İshki ister organdarynyń mańyzdy mindetteriniń biri - osy Ata Zańǵa súıene otyryp, azamattardyń quqyqtary men bostandyqtaryn qamtamasyz etý.
«Keleshekke kerýen tartqan memleketimizdiń turaqty damýyna ishki ister organdarynyń da qyzmetkerleri úlken úles qosady degen senimdemin. Ár otandasymyz Konstıtýsıanyń memleket pen qoǵam úshin ǵana emes, óziniń jeke basy men otbasy úshin de mańyzdylyǵyn tereń sezinýi tıis. Jyldan-jylǵa bizdiń basty qundylyqtarymyz – táýelsizdigimiz, kelisim men birligimiz nyǵaıa bersin! Ár shańyraqqa qut-bereke, yrys pen yntymaq tileımin. El irgesi aman, keleshegimiz kemel bolsyn», - dep aıtty İİM basshysy.