Qazirgi tańda Almaty oblysyndaǵy Qapshaǵaı sý qoımasynda shamamen 18,5 mlrd tekshe metr sý jınaldy.
Byltyr sý qoımasy sońǵy 10 jylda alǵash ret 100%-ǵa tolǵan edi, dep habarlaıdy aqshamnews.kz
Sý qoımasynyń tolýy oblystaǵy Aqdala jáne Sheńgeldi sýarmaly alqaptaryn sýmen tolyqtaı qamtýǵa múmkindik beredi.
Qapshaǵaı sý qoımasy İle ózeniniń sý aǵynyn rettep otyrady. Jyl basynan beri sý qoımasynan Balqash kóline 3,8 mlrd tekshe metr sý jiberildi. Al byltyr osy kezeńde bul kólem 2,9 mlrd tekshe metr bolǵan edi.
Sýdyń mol berilýiniń arqasynda bir jyldyń ishinde Balqash kóliniń deńgeıi 12 santımetrge kóterilip, Baltyq júıesi boıynsha 341,52 metrden 341,64 metrge jetti. Al kóldegi sý kólemi 2 mlrd tekshe metrge ulǵaıdy.
«Sý resýrstary jáne ırrıgasıa mınıstrligi transshekaralyq ózenderge, sonyń ishinde İle ózenine qatysty máseleler boıynsha qytaılyq áriptesterimen turaqty baılanysta. Birlesken jumystyń arqasynda qatarynan ekinshi jyl boıy Almaty oblysynyń dıqandary sýarmaly sýmen tolyq qamtamasyz etilip otyr. Sonymen qatar Balqash kóli baseınindegi ekologıalyq jaǵdaı da jaqsaryp keledi», - dedi Balqash-Alakól baseındik ınspeksıasynyń basshysy Serik Meırambekov.