Qalamyzdaǵy Respýblıka alańy 13 mekenjaıynda ornalasqan bıznes-ortalyqty jóndeý-qalpyna keltirý jumystary qarqyndy júrgizilýde, dep habarlaıdy almaty-akshamy.kz.
Ǵımarattyń syrtyna arnaıy qorǵanysh mata jabylǵan, ishki qurylys jumystarynyń júrgizilip jatqanyna shamamen bir jylǵa jýyqtady.
2022 jylǵy qańtarda Almatyda bolǵan qaıǵyly oqıǵalar kezinde qıraǵan ǵımaratqa kúrdeli jóndeý jumystaryn «Qazstroısentr» JSHS merdigerlik kompanıasy júrgizedi.
Atalǵan JSHS ókilderi qazirgi ýaqytta nysanda jóndeý jumystary júrgizilip jatqanyn «Vechernyı Almaty» gazetiniń tilshisine aıtyp berdi. Ekinshi, úshinshi jáne joǵarǵy qabattarda qatty ystanǵan qabyrǵalar men bos terezelerdiń orny kórinedi. Qasbetter men syrtqy jumystardy júrgizetin qurylysshylardyń mindeti - terezelerdi aýystyryp, qasbettiń qatty zaqymdanǵan jerlerin qalpyna keltirý.
Nysandy qalpyna keltirý jumystarymen arnaıy sheberler jáne ınjenerler toby, barlyǵy 30-dan astam jumysshy aınalysyp jatyr. Jóndeýdi jaýapkershiligine alǵan qurylysshylar josparlanǵan jumystardy belgilengen merzimde – osy jyldyń jeltoqsanynda aıaqtaýǵa sóz berip otyr.
Esterińizge sala keteıik, 2022 jyldyń qańtar aıynda Jańaózen qalasyndaǵy gaz óndiretin ónerkásip qyzmetkerleriniń narazylyq aksıalarynan keıin suıytylǵan gaz baǵasynyń ósýine baılanysty Qazaqstannyń basqa óńirlerinde de jappaı tolqýlar men tártipsizdikter bastalǵan bolatyn.
Almatyda 2022 jylǵy 4-5 qańtarda oryn alǵan narazylyq sońy jappaı tártipsizdikke, onyń ishinde úkimettik mekemelerge, ákimdik ǵımarattaryna, ishki ister organdaryna, prokýratýraǵa jáne basqa da memlekettik organdarǵa, sondaı-aq kásipkerlerdiń dúkenderine, bankterge, keńseler men qoımalarǵa jasalǵan shabýyldarǵa ulasty. Quqyq qorǵaý organdarynyń qyzmetkerlerine shabýyldar, atys, avtokólikter men ǵımarattardy órteý, tonaý sıaqty tártipsizdikter de oryn aldy.
Qala ákimdiginiń ǵımaraty qıratylyp, órteldi. Basqa nysandarmen birge elimizdiń jetekshi telekompanıalarynyń keńseleri ornalasqan Respýblıka alańy 13 bıznes-ortalyǵynyń ǵımaraty da zardap shekti. Reıderler men tonaýshylar ǵımaratty talqandady, qymbat jabdyqtardy qıratty, telearnalardyń qyzmetkerlerin uryp-soqty. Sonyń kesirinen búkil qurylymǵa orasan zıan keldi. Birneshe kúnnen keıin qala men eldegi tártip qalpyna keltirildi.
«Atameken» Ulttyq kásipkerler palatasynyń derekteri boıynsha, tek Almatyda bolǵan tártipsizdiktiń zalaly 92,4 mlrd teńge bolǵan.