Ótinish qabyldaý jyl sońyna deıin jalǵasady
Almatyda qańtar oqıǵasy kezinde shyǵynǵa ushyraǵan kásipkerlerdiń basym bóligi ótemaqy alyp úlgerdi. Olarǵa jergilikti búdjet qarajaty esebinen jáne túrli uıymdardyń qoldaýymen 16 mlrd teńgeden astam qarjy tólengen, dep habarlaıdy Almaty-akshamy.kz Almaty.tv-ge silteme jasap.
Qańtar qyrǵyny kezinde Raıymbek batyr dańǵylynda qaskóıler joldy bógep, kólik qatynasyn qıyndatqan edi. Olardyń sol kezdegi maqsaty - saýda úıin qıratyp, tonaý edi. Solaı boldy da. Esikti syndyryp kirip, baǵaly zattyń bárin qoldy qylǵan.
Saýda úıinde kúndelikti satyp otyrǵan taýarynan aıyrylǵandardyń biri – Aınur Adambekova. Ú balasynyń nápaqasyn osy kásippen taýyp otyrǵan ol bastapqyda qınalǵanyn aıtady. Keıinnen memleket olardy qaraýsyz qaldyrmady. Ótemaqy alyp, az ýaqyttyń ishinde kásibin qaıta jandandyrdy.
«3 mln-ǵa deıin tovar aqshasy qaıtarylady dedi. Sosyn chegin shyǵaryp berdik. Úkimet 1 mln qosymsha kómek berdi. Sonymen barlyǵy 4 mln aldym. Rıza boldyq. Jumysymyzdy qaıta bastadyq», – dedi jeke kásipker Aınur Adambekova
Almatyda jyl basynan beri Aınur sekildi 1640 kásipker ótemaqy alyp úlgergen. 616 shaǵyn jáne orta bıznes ıesi «Jańa Alataý» qory arqyly aqsha alsa, qalǵanyna jergilikti búdjet qarajaty esebinen tólendi. Onyń jalpy quny 16 mlrd 180 mln teńgeden asady. Mamandar qańtar kezinde shyǵynǵa ushyraǵan kásipkerlerden ótinish qabyldaý jyl sońyna deıin jalǵasatynyn aıtady.
«Ótinish info.kazakhstan saıty arqyly berýge bolady. Kásipkerge eshqaıda barýdyń qajeti joq. Óziniń ESP kilti arqyly kirse, barlyq qujat tizimde kórsetilgen. Qalǵan kásipkerler materıaldaryn sot ekspertızadan tezdetip ótkizip, qujattaryn tapsyrý kerek. Aımaqtyq komısıa óz jumysyn jyl sońyna deıin jalǵastyrady», – dedi Almaty qalalyq «Atameken» UKP Medeý aýdany fılıalynyń dırektory Aıbek Qazykenov.
Zardap shekken bıznesmenderge tek ótemaqy berilip qana qoımaı, qalalyq kásipkerlik basqarmasy jeńildetilgen paıyzben nesıe de berip jatyr. Shaǵyn jáne orta bıznes ıeleri bar bolǵany 2 paıyzben 10 mln teńgege deıin aqsha ala alady. Sondaı-aq bastapqy 6 aıǵa deıin olar salyq pen qosymsha aıyppuldardan da bosatylady eken.
«Qazir qańtar oqıǵasy kezinde shyǵynǵa ushyraǵan kásipkerlerdiń 99 paıyzy ótemaqylaryn alyp úlgerdi. Al ótemaqydan bólek, nesıege keler bolsaq, ol «Almaty Bıznes-2025» baǵdarlamasy arqyly beriledi. Ol úshin qala búdjetinen 6 mlrd 300 mln teńge qarastyrylǵan», – dedi kásipkerlik jáne ınvestısıalar basqarmasynyń bólim basshysy Ádil Jankın.
Aıta keteıik, qańtar qyrǵyny kezinde respýblıka boıynsha shyǵynǵa ushyrap, eń kóp zardap shekken ǵımarattyń basym bóligi osy megapolıste edi. Bir aıdyń ishinde kásipkerlerdiń basym bóligi ótemaqy alyp, az ýaqytta qala tirshiligine qan júgirdi.