Ońaltý prosesi oıyn túrinde ótedi.
Almatyda balalardy ońaltý ınovasıalyq ádisi iske qosyldy, dep habarlaıdy Almaty-akshamy.kz Almaty.tv-ge silteme jasap.
Ony elimizde alǵash bolyp qaladaǵy №2 qalalyq balalar aýrýhanasy qoldanysta synap kórdi. Qurylǵy tirek-qımyl apparatyn qalpyna keltirýge septesedi. Reabılıtasıaǵa arnalǵan qurylǵyda serebraldy sal aýrýy, bas-mı jaraqaty, ınsýlt, aýtızm jáne basqa neırodegeneratıvti aýrýlary bar balalar jattyǵa alady. Eń bastysy, ońaltý prosesi oıyn túrinde ótedi. Dárigerler kýrstan soń balalarda oń nátıje bolǵanyn aıtady.
«Buryn naýqastar ońaltý kezinde jattyǵýdy ınstrýktordyń kómegimen jasaıtyn. Ol barlyǵynyń basy qasynda bolyp túsindirip, ózi júretin edi. Bul jerde reabılıtasıadan ótý kezinde naýqas barlyq deńgeıdi ótýi kerek. Ol barlyq tapsyrmalardy ózi oryndaýy qajet. Ár balaǵa jeke baǵdarlama ázirlenedi», – dedi №2 qalalyq balalar klınıkalyq aýrýhanasy bas dárigeri orynbasarynyń mindetin atqarýshy Ásel Tólendıeva.