Qazir dúrbeleńge qatysty degen 25 adamnyń isi sotta qaralyp jatyr
«Qańtar oqıǵasyna» baılanysty qabyldanǵan «Raqymshylyq» týraly zańnyń aıasynda Almatyda 156 adamǵa amnıstıa sharasy qoldanyldy, Onyń ishindegi 4 azamatqa raqymshylyq sotqa deıingi tergeý kezinde kórsetilgen. Bul týraly qalalyq prokýratýra málimdedi, dep habarlaıdy Almaty-akshamy.kz Almaty.tv-ge silteme jasap.
Quzyrly organ tıisti sottarǵa probasıa baǵyty boıynsha jazany qysqartý nemese tolyq bosatý týraly orta jáne aýyr qylmys jasaǵan 181 adamǵa qatysty usynys joldaǵan. 152 is qaralyp, sheshim shyqqan. Soǵan sáıkes 152 adamnyń bireýi qamaýdan bosatylsa, qalǵanynyń jazasyn óteý merzimi qyrqartylypty.
«Amnıstıa qoldanylǵannan keıin ortasha aýyr qylmys jasaǵandar jazadan bostalady. Al aýyr qylmyspen aıyp talǵandardyń tek jazasyn óteý merzimi qysqarady. Bul raqymshylyq tulǵalardy aqtamaıdy, tek memlekettik bir rettik keshirim aktisi», – dedi qala prokýrorynyń orynbasary Nazarbaı Ybraımoldaev.
Qazir dúrbeleńge qatysty degen 25 adamnyń isi sotta qaralyp jatyr. 15 janǵa amnıstıa sharasy qoldanylýy múmkin. Al beıbereketti uıymdastyrǵandarǵa raqymshylyq jasalmaıdy. Sondaı-aq jańarǵan Konstıtýsıalyq zańǵa sáıkes Bas prokýrorǵa Konstıtýsıalyq sot pen Joǵarǵy sotqa júginý quqyǵy berildi. Sonyń aıasynda endi prokýrorlar sot tájirıbesi, qylmystyq, azamattyq ister boıynsha sottan túsinikteme alýǵa quqyly ári sot aktilerin toqtata alady.
«Budan bólek prokýrorlardyń tekseris júrgizýine kerekti negizdemelerdiń sheńberi keńeıdi. Qazir prokýratýra basshylary memlekettik organdarǵa ǵana emes, fızıkalyq erekshelikterine baılanysty ózin-ózi qorǵaı almaıtyn tulǵalar men kámeletke tolmaǵandardyń quqyǵy buzylsa, shaǵyn jáne orta kásip sýbektileriniń quqyǵy buzylsa tekseris taǵaıyndaı alady», – dedi qala prokýrorynyń aǵa kómekshisi Rýslan Sýhanberdın.