Tártipsizdik kezinde 2 myńnan astam bıznes ıesi shyǵynǵa batqan
1 jeltoqanǵa deıin Qańtardaǵy beıberekette zardap shekken barlyq kásip ıeleriniń shyǵyny ótelip bitedi. Bul týraly Almaty kásipkerler palatasynyń dırektory málemdedi, dep habarlaıdy Almaty-akshamy.kz Almaty.tv-ge silteme jasap.
Aıtýar Qoshmambetovtyń aıtýynsha, tártipsizdik kezinde 2 myńnan astam bıznes ıesi shyǵynǵa batqan. Múlki tonalyp, kásibi keri ketken kásipkerlerge memleket 15 mıllıard teńge ótemaqy tólegen. Al eń kóp zardap shekken nysandardyń kóshin elektrondy taýarlar dúkeni men brendttik kıimder bastap tur.
Elektrondy taýarlardy satýmen aınalysatyn kásipker Dıana Aıdarhan besinshi qańtar kúni astań-kesteńi shyqqan taýarlaryn terip, jınap alypty. Urylar 10 mınýttyń ishinde kirip, baǵaly zattarymdy alyp ketken.
«Ana jaqtan qol izin kóresiz, sodan sekirip ishinen teýip ashqan. Tórt jigit betperde, kepka kıip alǵan. Kameralardyń bárinen kórýge bolady. Memleket bizge tolyǵymen kómektesti. Basqa jeke kásipkerlerden kómek suraǵan joqpyz», – dedi kásipker Dıana Aıdarhan.
Al kásipkerler palatasy shaǵyn jáne orta bıznes shyǵynyn anyqtaý, arnaıy komısıanyń sheshim shyǵarýy biraz ýaqytqa sozylǵanyn aıtady. Sondyqtan keıbiriniń shyǵyny áli ótelmepti. Sebebi salyqtyq tabys qujaty tolyq emes. Tabys kózin jasyryp, salyq komıtetine túsimdi durys kórsetpeı kelgender bar.
«1632 kásipkerge 15 mıllıard shamasynda sýmmany qaıtaryp berdik. 2000 astam kásipker zardap shekti. Alaıda Prezıdenttiń tapsyrmasymen qıyn jaǵdaıǵa ushyrǵan kásipkerlerge qarjylaı qaıtarýdy uıǵardyq. Kóbi iri tehnıka satatyn dúkenderge, saýda ortalyqtaryna barǵan», – dedi kásipkerler palatasynyń dırektory Aıtýar Qoshmambetov.
Prezıdent Qasym Jomart Toqaev qańtardaǵy búlikten soń shaǵyn jáne orta bızneske qoldaý bildirý kerek dep arnaıy tapsyrma bergen. Shyǵynǵa batqan barlyq kásip ıelerine 1 jeltoqsanǵa deıin ótemaqy tólenip bitedi. Al qajetti qujaty bolmaǵan bıznes ıelerine demeýshilerdiń qarjysy bólinedi eken.