Densaýlyq saqtaý vıse-mınıstri Aıjan Esmaǵambetova qant qosylǵan tátti sýsyndarǵa aksızdik salyq ne úshin qajet ekenin túsindirdi.
Densaýlyq saqtaý mınıstrligi qant qosylǵan sýsyndar úshin qosymsha aksız engizýdi usynyp otyr, dep habarlaıdy almaty-akshamy.kz.
Onyń aıtýynsha, bul elde semizdik jáne qant dıabetimen aýyratyndar sanynyń artýymen baılanysty. Ásirese, semizdikke shaldyqqan balalar kóbeıip barady.
- Artyq salmaq bolashaqta sozylmaly aýrýlardyń damýyna ákeledi. Qatelespesem, 0,5 ml kolanyń quramynda qanttyń 10 táýliktik dozasy bar. Demek, bala tátti sýsyndy ishkennen keıin on eselik qajettikti alady. Sonymen qatar qant barlyq derlik ónimniń quramynda bolatynyn bilemiz, — deıdi Aıjan Esmaǵambetova senat kýlýarynda.
Onyń aıtýynsha, tátti sýsyndarǵa aksız engizýdi densaýlyq saqtaý mınıstrligi oılap tapqan joq. Bul Dúnıejúzilik densaýlyq saqtaý uıymynyń usynymy. Mundaı aksız kóptegen elde bar.
- Qant qosylǵan sýsyndarǵa salyq salý – tutynýdy azaıtýǵa septigin tıgizetin sharalardyń biri. Árıne, bul sharaǵa qosymsha tańbalaý engiziledi, mindetti aqparattyq-túsindirý jumystary jáne eń bastysy – balanyń durys tamaqtaný ádetin qalyptastyratyn ata-analarmen jumys júrgiziledi. Tamaqtaný ádeti balalarda bes jasqa deıin qalyptasady, — deıdi vıse-mınıstr.
Aıjan Esmaǵambetova bul bastamaǵa sýsyn óndiretinder qarsy ekenin aıtty.
- Bul qalypty jaǵdaı. Óıtkeni aksız óndirýshilerge qosymsha salmaq salady. Biraq biz bıznes pen halyqtyń densaýlyǵy arasyndaǵy balansty saqtaýymyz kerek. Sebebi, taǵy qaıtalap aıtamyn, balalar arasynda syrqattanýshylyq ósip barady. Sondyqtan densaýlyq saqtaý mınıstrligi durys tamaqtaný pozısıasynda qalady, — dedi ol.