Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Toqaev – Pýtın kezdesýi
Eki eldiń basshysy óńirlik jáne jahandyq kún tártibindegi máseleler jóninde pikir almasty.
«Bul – bizdiń jańa jyldaǵy alǵashqy kezdesýimiz, Vladımır Vladımırovıch. Biz bárimiz Reseıde 17 naýryzda ótetin prezıdent saılaýyn kútip otyrmyz. Túpkilikti nátıjeniń oıdaǵydaı bolaryna kúmánimiz joq. Óıtkeni Reseı Sizdiń bedeldi basshylyǵyńyzben tańqalarlyq tabysqa qol jetkizip keledi. Shyn máninde, Siz óz málimdemelerińizben, is-áreketińizben jahandyq kún tártibin qalyptastyrasyz. Bul bizdiń yntymaqtastyǵymyzǵa jáne Sizdiń byltyr qarasha aıynda Qazaqstanǵa jasaǵan memlekettik saparyńyz kezinde qol jetkizilgen ýaǵdalastyqtardyń oryndalýyna oń yqpalyn tıgizetini sózsiz. Meniń oıymsha, qos tarap, eki eldiń úkimetteri atalǵan ýaǵdalastyqtardy tabysty júzege asyryp jatyr. Qazirdiń ózinde naqty nátıje bar», dedi Qazaqstan Prezıdenti.
Alaqanmen aqsha tóleýge bolady
Qazaqstandyq ónertapqyshtar oılap tapqan «Alaqan» tólem júıesi adamnyń alaqanyndaǵy bıometrıalyq júıeni skanerleý arqyly jumys isteıdi. Tutynýshy AppStore nemese PlayMarket arqyly «Alaqan» qosymshasyn júkteı alady. Qosymshaǵa óziniń bank kartasyn tirkep, tıisti termınalda tólem jasaý múmkindigine ıe bolady.
«Bul – kózge kórinbeıtin bıometrıa. Jasandy ıntellekt alaqanyńyzdaǵy qan tamyrlaryn aıqyn kóredi, sýret nemese kóshirme nusqalardan tólem almaıdy», - deıdi «Alaqan tehnologies» JSHS dırektory Qanat Sárenbaev.
Panteonda 4 oryn qaldy
Sol 4 orynǵa kim jatatynyn sheshý úshin Ulttyq panteon týraly erejeniń jańa redaksıasy jarıalandy. Ol boıynsha prezıdentterdiń otbasy múshelerin, memlekettik hatshylardy, Konstıtýsıalyq keńestiń tóraǵalaryn, sondaı-aq "Qazaqstan Respýblıkasynyń tuńǵysh prezıdenti - Elbasy Nursultan Nazarbaev" ordenderiniń ıegerlerin alyp tastaý usynylady.
Túsindirme jazbada bul Qazaqstannyń tuńǵysh prezıdenti týraly zańnyń kúshi joıylǵanyna baılanysty jasalyp otyrǵany aıtylǵan.
Tańbalanǵan jarnama
Qazaqstan Respýblıkasynyń Mádenıet jáne aqparat mınıstri Aıda Balaeva onlaın-jarnamany tańbalaý qaǵıdalaryn bekitý týraly buıryqqa qol qoıdy. Tańbalaý ony sáıkestendirý múmkindigimen mátindik formatta júzege asyrylýy kerek. Eger onlaın-jarnama dybystyq nemese aýdıokórneki nysanda taratylǵan jáne ornalastyrylǵan bolsa, tańbalaý onlaın-jarnamanyń aldynda júzege asyrylýǵa tıis. Iaǵnı tańbalaýda ornalastyrylǵan materıaldyń jarnama ekendigi týraly mátindik nusqama bolýy shart.
Sý salasyna mamandanǵan JOO qurylýy múmkin
Prezıdenttiń keńesshisi Qanat Bozymbaev «Global Water» atty sý únemdeý tehnologıalaryna arnalǵan birinshi halyqaralyq forýmda osy týraly málim etti.
«Bul máselede halyqaralyq tájrıbeni eskerý óte mańyzdy. Ókinishke qaraı, bizdegi sý salasyn ǵylymı zertteý jaǵy shetelmen salystyrǵanda birtalaı artta qalǵan. Qazir bizge bul salada sapaly mamandar buryn bolmaǵan deńgeıde qajet. Elimizdegi bazalyq joǵary oqý oryndarynyń birin taza sý taqyrybyna mamandanǵan ýnıversıtet etip qalpyna keltirý máselesi qaralyp jatyr», - dedi Prezıdent keńesshisi.
Áýlıeataǵa bardyń ba, ulý etin jediń be?..
Jambyl oblysy Ortalyq Azıa boıynsha ulý etin ósiretin alǵash óńir atanbaq. Italándyq «Lumacheria Italiana» kompanıasy Jambyl oblysynda bıylǵy jyly ónerkásiptik maqsatta ulý ósirýdi qolǵa alýdy josparlap otyr. Jalpy, kosmetologıada ulýlar shyǵaratyn qabyq pen kilegeı shyrysh qoldanylady. Al, ulý eti – bul erekshe ónim jáne ol álem elderinde úlken suranysqa ıe. «Lumacheria Italiana» kompanıasy ulýlar óndirisinde álemde kósh bastap tur.
Qazaqstan qyzylshanyń taralýynan birinshi orynda tur
Qyzylshany vaksınamen toqtatýǵa bolady. Biraq búginde Qazaqstanda vaksınamen basqarylatyn ınfeksıalyq aýrýlardy epıdemıologıalyq baqylaý jaǵynan júıeli kemshilikter bar. Ony densaýlyq mınıstri de moıyndap otyr. Osy oraıda Álnazarova ınfeksıalyq aýrýlardy boljamdaý jáne baqylaý júıesin kúsheıtý úshin birqatar sharalardy atqarý qajet dep sanaıdy.
Ramazan kele jatyr!
Sharıǵat jáne pátýa bólimi bekitken kúntizbege sáıkes, Ramazan aıy 11 naýryzda bastalady. Qadir túni 5 sáýirden 6 sáýirge qaraǵan túnge túsip tur. Oraza aıt – 10 sáýir. Al Qurban aıttyń birinshi kúni 17 maýsymǵa keledi.
Eıfel nege jabyldy?
Eskertkishtiń basshylaryna qarsy shyqqan Eıfel munarasynyń qyzmetkerleri bılet qunynyń ósýine sáıkes jalaqyny da kóterýdi talap etip otyr.
Eıfel munarasy 19 aqpannan bastap jabylǵan. Týrısik oryn osy apta boıy kelýshilerdi qabyldamaýy múmkin. Ázirshe munaraǵa kóterilý múmkin emes. Elektrondyq bıletteri bar adamdar qosymsha aqparat alý úshin elektrondyq poshtalaryn tekserýleri kerek.
«Dástúrden» ozǵan «Mirjaqyp»
«Mirjaqyp. Oıan, qazaq!» Ticketon Awards syılyǵynyń aldyn ala daýys berý nátıjesi boıynsha «Dástúrdi» basyp ozdy. Qazaqtyń tarıhı dramasy «Mirjaqyp. Oıan, qazaq!» daýys berýdiń aldyn ala qorytyndysy boıynsha ol «Otandyq jyl fılmi» nomınasıasynda 1424 daýys jınady. Ol 625 daýystyń jartysyna jýyq daýys jınaǵan sensasıalyq qazaqstandyq «Dástúr» qorqynyshty fılmin basyp ozdy.
Derekter qoldy bolǵan ba?
"BJZQ" AQ GitHub saıtyndaǵy qujattarǵa belgisiz tulǵalar ornalastyrǵan qazaqstandyqtardyń derbes derekteriniń BJZQ derekqorynan shyǵýy týraly jelide taralǵan aqparattyń shyndyqqa sáıkes kelmeıtini týraly resmı málimdeme jasaıdy. BJZQ qaýipsizdik qyzmeti GitHub saıtynda ornalastyrylǵan derekterge egjeı-tegjeıli taldaý júrgizdi. Nátıjesinde, jarıalanǵan katalogta enpf.kz saıtynyń sıpattamasy ǵana kórsetilgeni anyqtaldy. Bul saıt ashyq aqparat kózi bolyp tabylady jáne onda salymshylar men alýshylardyń derbes derekteri joq.
Kıber-keleshek
Elimizde 5-8 jastaǵy balalardyń 45%-y ınternet qoldanady.
«IýNISEF-tiń jahandyq esebinde álemdegi árbir úshinshi ınternet qoldanýshysy bala delingen. Oqý-aǵartý mınıstrligimen birlesip byltyr Qazaqstandaǵy balalardyń onlaın-qaýipsizdigi men tájirıbesi boıynsha zertteý júrgizdik. Nátıjesinde Qazaqstanda balalar ınternetke buryn-sońdy bolmaǵan jyldamdyqpen jáne erte jastan qosylatynyn anyqtadyq. Zertteýge sáıkes, balalardyń 45%-y ınternetke 5-8 jasynda, al balalardyń 5%-y odan da erte - 4 jáne odan kishi jasta qosylady», - dedi IýNISEF-tiń balalyq shaqty qorǵaý baǵdarlamalarynyń jetekshisi Aısulý Bekmusa.