Reseıde QIWI Banktiń lısenzıasyn qaıtaryp alý saldarynan iri bankterdiń tólem qyzmetteri isten shyǵyp, ásirese, komýnaldyq-sharýashylyq qyzmetteri aqysyn tóleý kezinde problema týyndady, dep habarlaıdy almaty-akshamy.kz
Anyǵynda, Reseı banki QIWI tobyna kiretin QIWI Banktiń lısenzıasyn keri qaıtaryp aldy.
Mamandar bul Reseıdegi sońǵy bir jarym jylda birinshi ret bolǵan oqıǵa ekenin aıtyp otyr. Ortalyq bank bul áreketin banktiń federaldy zańdar men retteýshiniń normatıvtik aktilerin buzǵanymen túsindiredi.
«Áý basta banktiń bıznes-modeli táýekeli joǵary operasıalardy júrgizýge negizdelgen edi. Qarjy ınstıtýty zańdy buzdy, azamattardyń jeke deregin jónsiz qoldanyp, olarǵa qaýip tóndirdi», – dedi OB ókili.
Osy oqıǵaǵa oraı QIWI Kazakhstan «Biz halyqaralyq bıznestiń bir bóligimiz, biraq Reseı bankimen baılanysymyz bar»,-dep málimdedi. Qazaqstandyq kompanıa QIWI toby bıznesti halyqaralyq jáne reseılik dep ekige bólgenin jetkizdi.
«Reseıde QIWI Bank, Contact aqsha aýdarymdary júıesi, ROWI jáne Realweb kompanıalar toby, Flocktory qaldy. QIWI Kazakhstan QIWI PLC halyqaralyq bıznesiniń bóligi bolyp sanalady jáne kompanıa osy baǵdarlama aıasynda damýǵa kúsh jumsaıdy. Sizderdiń suraqtaryńyz kóp ekenin túsinemiz, qolymyzǵa qandaı da bir aqparat túsken jaǵdaıda, habarlaımyz»,-dedi kompanıa ókili.
QIWI Kazakhstan quramyna 17,2 mıllıonnan astam vırtýaldy ámıan, 181 myńnan astam termınal, onyń ishinde Qazaqstandaǵy 30 myńnan astam tólem qabyldaý pýnktteri kiredi.