Iordanıa astanasy Amman qalasynda ótip jatqan grek-rım kúresinen 20 jasqa deıingi jastar arasyndaǵy Azıa chempıonaty ótýde.
Qazaqstandyq balýandar bul dodada 3 kúmis, 1 qola medal aldy, dep habarlaıdy Almaty-akshamy.kz.
12 shildeden bastap kúres túrlerinen 15 jáne 20 jasqa deıingi jasóspirimder men jastar arasynda Azıa chempıonaty ótip jatyr.
Jarystyń tórtinshi kúninde grek-rım kúresinen 20 jasqa deıingi jastar synǵa tústi. Olardyń arasynan qazaqstandyq úsh balýan fınalda kúsh synassa, bireýi qola júldeni sarapqa saldy.
Fınalǵa shyqqan Aıbek Aıtbekov (55 keli), Iýsýf Ashrafov (60 keli) jáne Nurasyl Amanaly (87 keli) qarsylastaryna ese jiberip, kúmis júldeni qanaǵat tutty.
Al 130 kelidegi Johar Ýzarov qola úshin bolǵan talasta Palestına balýanyn utty.
Endi 16 shildede U20 grek-rım kúresinen 60, 67, 72, 82 jáne 97 kelide júldeler sarapqa salynady.