Eger jalǵan nesıe ekeni anyqtalsa.
Májiliste Qarjy naryǵyn damytý jáne retteý agenttiginiń (QNDRA) tóraǵasy Mádına Ábilqasymova alaıaqtyqpen kúresý sharalary týraly aıtty, dep habarlaıdy Almaty-akshamy.kz.
Ábilqasymovanyń aıtýynsha, agenttik ekinshi deńgeıli banktermen memorandým daıyndap, qazir qol qoıý barysynda, oǵan sáıkes, banktik operasıa alaıaqtyq dep tanylsa, mundaı nesıe boıynsha syıaqy esepteý toqtatylady.
"Sotta munyń jalǵan nesıe ekeni jáne paıdalanýshynyń ózi bul qarajatty almaǵany dáleldengen kezde, bank bul somany qaıtarady. Nesıe tolyǵymen esepten shyǵarylady nemese eger ol paıdalanýshynyń jeke qarajaty bolsa, oǵan qaıtarylady", – dedi Ábilqasymova.
Bul rette qarjy retteýshisiniń tóraǵasy bul úshin zańnamalyq deńgeıde belgili bir ózgerister qajet bolatynyn jáne olar depýtattardyń qoldaýyna úmit artyp otyrǵanyn atap ótti.
"Sonymen qatar, jol kartasy aıasynda túzetýler daıyndadyq. Aqparattyq qaýipsizdik prosedýralaryn saqtamaý saldarynan alaıaqtyq tirkelgen jaǵdaıda qarjylyq uıymnyń zalaldy óteý jaýapkershiligin zańnamalyq deńgeıde belgileýdi usynamyz. Osy máselelerdi Parlament qaraýyna engizýge qoldaý kórsetýdi suraımyz", - dep qosty agenttik tóraǵasy.