Sońǵy sheshimdi sot qabyldaıdy.
İshki ister ister mınıstrligi turmystyq zorlyq-zombylyq úshin jazany kúsheıtti, dep habarlaıdy Almaty-akshamy.kz
Qylmystyq kodekske engizilgen ózgerister mamyrda, al ákimshilik jazaǵa qatysty túzetýler shilde aıynda kúshine enedi.
Resmı málimetke sáıkes, búginde turmystyq zorlyqtan zardap shegýshiler ómirine nemese densaýlyǵyna qaýip tóngen kezde polısıaǵa júginedi, al tártip saqshylary kelgennen keıin agresorlarǵa qarsy aryz jazýdan bas tartady. Ótken jyldyń ózinde polısıany 70 myń ret shaqyrǵan. Biraq aryz jazylmaǵan.
Polısıa kelip ketkennen keıin otbasyndaǵy janjal kóp jaǵdaıda ári qaraı jalǵasady, keıde bul aýyr zardaptarǵa ákelip soǵyp jatady. Sondyqtan aryzsyz ákimshilik is qozǵaýǵa sheshim qabyldandy.
Ákimshilik polısıa komıteti tóraǵasynyń orynbasary Renat Zulqaıyrovtyń aıtýynsha, ákimshilik hattamany toltyrý úshin kórshiler men kýágerlerdiń aıǵaqtary eskeriledi. Sondaı-aq beınebaqylaý kameralarynyń materıaldary negizge alynady. Sońǵy sheshimdi sot qabyldaıdy.
Erli-zaıypty sotta qaıta tatýlasa almaıdy
Qazirgi kezde ákimshilik hattama rásimdelgennen keıin jábir kórgen áıelder agresormen sotta tatýlasyp jatady. Olarǵa qysym jasalady, ıa bolmasa, týystary aryzyn qaıtarýǵa kóndirip jatady.
Mysaly, ótken jyly turmystyq janjaldar boıynsha sotqa 47 myń ákimshilik is jiberildi. Sonyń ishinde 20 myń is taraptardyń tatýlasýyna baılanysty toqtatyldy.
Endi sotta bir ret qana tatýlasýǵa múmkindik beriledi. Odan keıin janjal qaıtalansa, áıeli keshirim jasasa da, agresor jaýapqa tartylady.
Ákimshilik jaza qandaı bolady?
Búginde turmystyq zorlyq-zombylyq úshin 5,10 jáne 15 táýlikke deıin qamaýǵa alý jazasy qarastyrylǵan. Al sottar kóbinese 1-5 táýlikke qamaýǵa sheshim shyǵaryp otyrady.
Ákimshilik kodekske engizilgen túzetýlerge sáıkes, zań buzǵan adamǵa eskertý jasalady, ıa bolmasa, birden 5 táýlikke qamap tastaıdy. Al zań buzýshylyq qaıtalansa, 10 táýlikke qamalady. Jazanyń merzimine qatysty baptardan "deıin" degen sóz alynyp tastaldy.
uryp-soqqany úshin kem degende 10 táýlikke qamaý (bir jyldyń ishinde qaıtalansa, 20 táýlik);
densaýlyqqa jeńil zıan kelse, 15 táýlikke qamaý (bir jyldyń ishinde qaıtalansa, 25 táýlik);
qorǵaý nusqamasyn buzǵany úshin eskertý bolmaıdy, birden 10 táýlikke jaýyp tastaıdy;
sottyń júrip-turýǵa qatysty talabyn buzǵany úshin aıyppul salynbaıdy, 10 táýlikke qamaýǵa alady (bir jyldyń ishinde qaıtalansa, 20 táýlik).
Qylmystyq kodekske engizilgen túzetýler
Qylmystyq kodekstiń jekelegen baptaryna (QK 106-baby, QK 107-baby) aýyr jáne ortasha aýyrlyqtaǵy densaýlyqqa zıan keltirýge baılanysty "kinálige materıaldyq nemese ózge de táýeldiligi bar adamǵa qatysty is-áreket jasaý" degen saralaý belgisi engizildi.
Osynyń arqasynda qylmysty shaǵyn aýyrlyqtan ortasha aýyrlyqqa aýystyrýǵa jáne qylmyskerdi oqshaýlaý úshin qamaýǵa alý túrindegi sanksıany qoldanýǵa, sondaı-aq jaýapkershilikti kúsheıtýge múmkindik bar. Al Qylmystyq kodeks boıynsha densaýlyqqa qasaqana aýyr zıan keltirgeni úshin 3 jyldan 8 jylǵa deıin bas bostandyǵynan aıyrý jazasy qarastyrylǵan. Osy qylmys eki jáne odan da kóp adamǵa qatysty jasalsa, 6 jyldan 10 jylǵa deıin túrmege qamap tastaýy múmkin.
Budan bólek, 107-bapta densaýlyqqa qasaqana aýyrlyǵy ortasha zıan keltirgeni úshin jaýapkershilik qarastyrylǵan. Jazanyń merzimi – 2-3 jyl.
Ózgerister qashan kúshine enedi
Bıyl 16 naýryzda Parlament depýtattary tıisti zańdy qabyldady. Prezıdent qol qoıdy.
Osylaısha Qylmystyq kodekske engizilgen ózgerister 19 mamyrdan, al Ákimshilik quqyqbuzýshylyq týraly kodekske engen túzetýler 1 shildeden bastap zańdy kúshine enedi.