№62 gımnazıanyń 62 oqýshysy Naýryzdy naqyshtady
«Qamqordyń» áleýmettik úıiniń ereksheligi, jalǵyzbasty zeınetkerdiń óz páteri bar. Naýryz qarsańynda ótkizilgen sharada janashyr jandar – kásibı mýzykanttar, gımnazıa oqýshylary kelip, ata-ájelerine ónerin kórsetip, syı-sıapatyn jasap, qarttardyń rızashylyǵyna bólenip, batasyn aldy.
«Qalamyzdyń Jumyspen qamtý jáne áleýmettik baǵdarlamalar basqarmasyna qarasty bul áleýmettik úı 2002 jyly ashylǵan. TMD boıynsha tek Máskeýde ǵana osyndaı «qarttar úıi» bar. Bul nysan sol jobamen qolǵa alynǵan bolatyn. Munda 74 páter bar. Sonyń 42 páterinde qarıalar turyp jatyr. Búgin munda quttyqtap kelgender -- ónerli de ónerpaz toptar: «Almaty áýender» kompanıasyna qarasty Murat Serkebaev basqaratyn kameralyq aspaptyq orkestrdiń kvarteti, №62 gımnazıanyń ónerpaz-oqýshylary. Oqýshylar áýelete án shyrqap, myń burala bıledi, óz ónerimen tánti etti», -- dedi «Qamqor» áleýmettik úıiniń dırektory Turarbek Tumanshıev.
Uly Abaıdyń 14-qarasózine júginer bolsaq, Naýryzdyń mán-mańyzy túsinikti bola túser. Naýryz adamzatqa raqymdylyq pen meıirbandylyq ákeletin mereke. Memleket basshysynyń Naýryz merekesin mazmundy da mándi ótkizý tapsyrmasymen «Naýryznama» onkúndigine oraı, «Qaıyrymdylyq kúninde» qarttar ornalasqan áleýmettik úıge kelip, shákirtter óz ónerin kórsetti.
«Qazynaly qarttarǵa kóterińki kóńil-kúı syılaǵan Almaly aýdanyndaǵy №62 gımnazıadan 62 ónerpaz shákirt Naýryzdy naqyshtap, án salyp, bı bıledi. Mektebimizden «Murager» orkestri, «Nargız» bı toby óner kórsetýde. Bastaýysh synyptan jasaqtalǵan «Táttiler» toby da óner kórsetýde. Atalǵan orkestrimiz, óner toptary -- qalalyq, respýblıkalyq óner baıqaýlaryn aıtpaǵanda, halyqaralyq konkýrsta da júlde alǵan ónerpazdar. Qarıalarǵa qurmetimiz aıryqsha, ázirlep alyp kelgen táttilerden dám tatqyzdyq», -- deıdi Shona Smahanuly atyndaǵy №62 gımnazıa dırektory Meıramgúl Nábıdollaqyzy.
Qarttardyń kóńi-kúıi keremet. Ónerli jastar, balalar án shyrqady, kúı tókti. «Án – kóńildiń ajary» ǵoı. Saz-áýenniń jandy jadyratatyny bar.
«Munda bári janǵa jaıly, jaǵdaıymyz jaqsy. Merekelik kóńil-kúı ta-ma-sha! Naýryz – jańa jyl basy, bereke-birlik, tatýlyqtyń merekesi. Búgin óner kórsetken Murat Serkebaevtyń jetekshiligindegi kameralyq orkestrdiń kvartetine, ónerpaz oqýshylarǵa rıza boldyq. Ákimshiliktiń bizge degen kóńil bólýine dán rızamyz. «Qamqorda» qamqorlyqqa bólenýdemiz», -- deıdi áleýmettik úıdiń turǵyny Zýlfıra apamyz.