Ǵylymı-zertteý ınstıtýtynyń «Uly dala» ǵylymı jýrnaly áleýmettik jáne qalalyq zertteýlerge baǵyttalǵan.
Ár shyǵarylymda túpnusqa maqalalar, sondaı-aq suhbat, resenzıalar jarıalanady.
Jýrnaldy basyp shyǵarýdaǵy negizgi maqsaty -- qalalyq jáne áleýmettik zertteýler salasyndaǵy ózekti irgeli jáne qoldanbaly ǵylymı zertteýlerdiń nátıjesin jarıalaý. «Almaty bas jospary» ǵylymı-zertteý ınstıtýty» ǵylymı bólimi salalyq ǵylymı zertteýlerge arnalǵan jýrnal shyǵarýǵa bastamashy boldy.
«Jýrnaldy damytýǵa oraı, sarapshylar men mamandardy ıdeıa aıtýǵa, tájirıbe bólisýge shaqyramyn. Osylaısha, biz neǵurlym turaqty, kreatıv jáne fýnksıalyq sáýlet sheshimderin birge qura alamyz», -- dep atap ótti Qalalyq josparlaý jáne ýrbanıstıka basqarmasynyń basshysy Nurlan Boranbaev.
«Jýrnaldyń ǵylymı basylymdarynda qala qurylysy, qala jáne odan tys jerlerdegi áleýmettik qatynas, ekologıa, landshaft jáne qorshaǵan ortany jobalaý máseleleri talqylanady. Materıaldardyń basym bóligi áleýmettik-ekonomıkalyq zertteýler, quqyqtyq retteýdi taldaý, qalalyq jáne óńirlik josparlaý, aýmaqtardyń ınfraqurylymdyq jáne mádenı damý, tabıǵı jáne qalalyq ortany, kólik pen utqyrlyqty damytýǵa arnalady», -- deıdi «Almaty bas jospary» ǴZI bas dırektory Asqat Sadýov.
Avtorlardyń aıtýynsha, jýrnal zamanaýı sáýlet pen qala qurylysynyń ózekti máselelerin talqylaý jáne sheshý, ozyq ádistemelik, uıymdastyrýshylyq jáne basqarý tájirıbesin anyqtaý jáne taratý úshin biryńǵaı komýnıkasıalyq alań qurýǵa yqpal etetin bolady.
«Ǵylymı basylym ǴZI-dyń jobasy, ázirlemesi men qyzmetin kórsetetin bolady. Mysaly, «Almatybasjospar» qalanyń aerasıasyn ázirleýge qatysty qazir qala aýmaǵyndaǵy barlyq tarıhı eskertkish pen qorǵandardy túgendeý jónindegi jumysy, halyqaralyq tájirıbe almasý júrgizilýde. Biz barlyq ǵylymı jumys týraly jýrnalymyzda jazatyn bolamyz. Sondaı-aq, ýrbanıster men sáýletshilerdi jýrnaldyń damýyna óz úlesin qosýǵa shaqyramyz», -- dedi «Almaty bas jospary» ǴZI» JSHS ǵylym jónindegi dırektory Erlan Saltykov.
Birinshi shyǵarylymǵa mynadaı materıaldar kirdi: Almaty qalasyndaǵy aýa sapasyna áser etetin aspekti men yqtımal josparlaý sheshimderi, qala turǵynynyń saýalnamasyn ázirleýshilermen suhbat, retteýdiń utqyr tájirıbesi, sonyń ishinde, dızaın-kod pen halyqtyń qatysý búdjeti, óńirlerdegi aýyldyq kóshi-qon pen úıge degen kózqaras, qalalyq qoǵamdastyq pen jańa turǵyn úı keshenderindegi jańa orta taptyń qalyptasýy, t.b. Jýrnal jylyna tórt ret (toqsan saıyn) shyǵady.