Naýryzbaı aýdanyndaǵy Oqýshylardyń shyǵarmashylyq ortalyǵynda ardagerler arasynda ekinshi dúnıejúzilik soǵystaǵy Jeńistiń 80 jyldyǵyna arnalǵan teatrlanǵan ádebı-mýzykalyq kesh uıymdastyryldy.
Aýdandyq Ardagerler keńesi osy mańyzdy oqıǵaǵa oraı, aýmaq (okrýg yqshamaýdandary) ardagerler arasynda kórkemónerpazdar baıqaýyn uıymdastyrdy. Atalǵan sharanyń maqsaty – jas urpaqty otanshylyqqa rýhta tárbıelep, el úshin erlikke jeteleý. El basyna kún týǵan, at aýyzdyǵymen sý ishken sol bir surapyl shaqta maıdandaǵy keńes sarbazdarynyń batyrlyǵyn dáriptep, erligin eske alýǵa arnalǵan, túrli qaýymdastyq arasyndaǵy ózara túsinistikti nyǵaıtýǵa baǵyttalǵan bul saıystyń máni basqa saıystan ózgerek.
Baǵdarlamada ekinshi dúnıejúzilik soǵystaǵy keńes sarbazdarynyń dańqyna arnalǵan, maıdangerlerdiń jankeshtiligi men tabandylyǵyn beınelegen, mýzykalyq jáne kórkemdik nómirlerdi beıneleıtin skechter qoıyldy. Óner baıqaýynyń sońynda ádilqazy alqasy birinshi júldege «Qalqaman» yqshamaýdany okrýginiń ardagerler toby laıyqty dep sheshim qabyldady. «Baq shaba ma, bap shaba ma?» degen sol, turǵyny tyǵyz shoǵyrlanǵan aýmaq ónerpazdarynyń óneri ádil baǵalandy dep bilemiz.
«Jeńistiń 80 jyldyǵy qarsańynda daıyndaǵan myna sharamyz jas jetkinshekterge otanshyl rýh, jalyn-jiger beredi degen oıdamyz. Elbasyna kún týǵan sol soǵys kezindegi maıdan men el ómirin beıneleıtin skech qoıdyq. Bas-aıaǵy on bes mınýtqa sozylǵan ýaqytta kórkemónerimizdi kórsetken aýmaǵymyzdyń ardagerleri maıdandaǵy jankeshti Jeńisti tyldaǵy eren eńbektiń jaqyndatqanyn beıneleýge tyrysty. Sonyń nátıjesi bolar, ónerimizdiń baǵasy aýdannyń 8 okrýgi ishinen tórtinshi satysynan tabyldy», – deıdi Qaraǵaıly okrýgi ardagerler keńesiniń tóraǵasy, Jeltoqsan qaharmany Árip Qabylanov.